Քաղաքականություն
14.04.2024 | 15:46
Լեգիտիմ պաշտպանության իրավունքի իրացումը ցույց է տալիս Իրանի պատասխանատու մոտեցումը տարածաշրջանային և միջազգային խաղաղության և անվտանգության նկատմամբ։ Այս մասին X-ի իր միկրոբլոգում գրել է Իրանի արտգործնախարար Հոսեյն Ամիր-Աբդոլլահյանն՝ արձագանքելով Իսլամական հեղափոխության պահապանների կորպուսի անօդաչու սարքերի և հրթիռների հարձակմանը Իսրայելի վրա՝ ի պատասխան ապրիլի 1-ին Սիրիայում Իրանի հյուպատոսության շենքի վրա ահաբեկչության։
«Այս պահին Իրանի Իսլամական Հանրապետությունը պաշտպանական գործողությունները շարունակելու մտադրություն չունի, սակայն անհրաժեշտության դեպքում չի վարանի պաշտպանել իր օրինական շահերը ցանկացած նոր ագրեսիայից»,- ասել է նա։
Դիմելով Թեհրանում բնակվող դեսպանների և օտարերկրյա առաքելությունների ղեկավարների խմբին՝ իրանցի բարձրաստիճան դիվանագետը նաև ասել է. «Այսօր առավոտյան Սպիտակ տանն ուղղված մեր ուղերձում մենք բացատրեցինք, որ դա սահմանափակ պատասխան էր»:
Արտգործնախարարը շեշտել է, որ Իրանը չի թիրախավորել ոչ մի խաղաղ բնակչի։
«Մենք չենք ձգտում թիրախավորել ամերիկացիներին և տարածաշրջանում գտնվող բազաները և չենք ողջունում լարվածության ընդլայնումը»,- ասել է նա՝ հավելելով. «Մենք թիրախավորելու ենք ամերիկյան բազաները, եթե դրանք օգտագործվեն սիոնիստական ագրեսիային օգնելու համար»,- նշել է Աբդոլլահյանը՝ հավելելով, որ Եթե ՄԱԿ-ը դատապարտեր Իսրայելի հարվածը, Իրանը երկու անգամ կմտածեր պատասխանելու մասին։
