Հասարակություն
09.04.2024 | 20:00Քաղաքացի Կարինե Գասպարյանն այսօր ահազանգել էր Factor TV՝ նշելով, որ քաղաքապետարանի աշխատակիցներն ուզում են քանդել Երևանի Հայկ Հովսեփյան 11 հասցեում գտնվող իր ավտոտնակները։ Հողամասի վարձակալության պայմանագիրը, որի վրա կառուցվել է ավտոտնակներից մեկը, կնքվել է 2003 թվականին՝ Երվանդ Զախարյանի քաղաքապետության օրոք, 10 տարի ժամկետով։ Կարինե Գասպարյանը պնդում է, որ 10 տարի օգտագործելուց հետո այն իրենց է պատկանում։
Տարածքում էին նաև ոստիկաններ․ մինչ նրանք ու թաղապետարանի աշխատակիցները Կարինե Գասպարյանին բացատրում էին, որ ավտոտնակը պիտի ապամոնտաժվի, տեխնիկան մյուս կողմում գործի անցավ՝ ավտոտնակներից մեկն ապամոնտաժվեց։
Շենգավիթ վարչական շրջանի ղեկավարի օգնականն ասաց՝ օրինական ճանապարհով կառուցված ավտոտնակի վրա քաղաքացին հետագայում ծավալներն ինքնակամ ավելացրել է, ուստի պայմանագիրը 2020 թվականին խզվել է, իսկ մյուս ավտոտնակն ապօրինի է կառուցվել։
Կարինե Գասպարյանն ու որդին որոշեցին քաղաքապետի՝ ավտոտնակներն ապամոնտաժելու որոշումը վիճարկել դատարանում։
Իսկ թաղապետարանի աշխատակիցներն այս ընթացքում հասցրել էին բակի այլ ավտոտնակներ ևս ապամոնտաժել, որոշներն ապօրինի, որոշները՝ օրինական, բայց ասացին՝ բնակիչները համաձայնել են քանդել, քանի որ խաղահրապարակ է կառուցվելու․ աշխատանքներն արդեն մեկնարկել են։
Մանրամասները՝ տեսանյութում։
Արփի Հակոբյան
