Վարչապետը չի ընդունում, որ ՀՅԴ-ն և ԲՀԿ-ն իրեն հավասար են, դրա համար էլ հրաժարվում է կոալիցիայից․ Արմեն Բադալյան․ ՏԵՍԱՆՅՈՒԹ

Վարչապետ Նիկոլ Փաշինյանը Հանրապետության հրապարակում հանրահավաքի ժամանակ հնչեցրեց արտահայտություններ, որոնցից մեկով, օրինակ, պարզ դարձավ, որ  ստեղծվում է նոր մարմին՝ Հանրապետության հրապարակ,  սակայն հարց է առաջանում, այդ մարմինն արդյոք ամրագրվա՞ծ է Սահմանադրությամբ, թե՞ ոչ, պարզվեց, որ ամրագրված չէ, և, փաստորեն,  կարելի է ոտքի վրա իշխանության մարմին ստեղծել։ 

Այսօր հրավիրված մամուլի ասուլիսի ժամանակ նման տեսակետ հայտնեց քաղտեխնոլոգ Արմեն Բադալյանն՝ ընդգծելով, որ հրապարակը չէ, որ Կառավարություն է ձևավորել, հետևաբար, նախարարներին էլ պետք չէ, որ իրենց հաշվետվությունները ներկայացնեն հրապարակին։ 

«Իշխանության այս նոր մարմինը որ ստեղծվեց՝ ինչպե՞ս է ձևավորվում, բակերում մարդիկ լիազոր մարմիննե՞ր են ձևավորելու, վկայականնե՞ր են ունենալու, թե այլ բան։ Հիմա, կամ մենք ընդունում ենք, որ սա պոպուլիզմ է, կամ պետք է մանրամասն քննել, թե այդ նոր մարմինն ինչպե՞ս է ձևավորվելու․ լրագրողներն այս հարցերը պետք է տան վարչապետին»,- ասաց Բադալյանը։ 

Վերջինիս համար անհասկանալի է նաև, թե վարչապետի առաջարկած նոր մարմինն ինչպե՞ս է իր հաշվետվությունը ներկայացնելու հասարակությանը, ինչպե՞ս է այն ընդունվելու քաղաքացիների կողմից, ի՞նչ է լինելու, երբ, օրինակ,  Հանրապետության հրապարակում հավաքվի ոչ թե 100 հազար, այլ, ասենք, 10․000 քաղաքացի։

Քաղտեխնոլոգ Արմեն Բադալյանն անդրադարձավ նաև կոալիցիոն կառավարությունից հրաժարվելու՝ Կառավարության քայլերին և շեշտեց․ «Կոալիցիան իրենից ենթադրում է հավասար ուժերի միություն՝ անկախ նրանից, թե այդ դաշինքի մեջ մտնող ուժերն ինչ ազդեցություն ունեն, վարչապետը կոալիցիա չի ընդունում, քանի որ չի ուզում ընդունել, որ ՀՅԴ-ն և ԲՀԿ-ն իր հետ հավասար են, այսինքն՝ վարչապետն իր թիմով բարձր է, մյուսները ցածր են․ դա է կոալիցիայց հրաժարվելու պատճառը»։

Մանրամասները՝ տեսանյութում։