24.04.2026 | 23:32
Կապանում ջրանջատում կլինի
Փաշինյանի ելույթից հետո արցախցի երկու ընտանիք հեռացել է Ոսկեպարից
Հասարակություն
21.03.2024 | 22:42
Արցախցի երկու ընտանիք հեռացել է Ոսկեպարից` Նիկոլ Փաշինյանի հայտարարությունից հետո։ Արցախցիների հեռանալու լուրն այսօր Ոսկեպարում Factor TV-ին հայտնել են գյուղի բնակիչները, երբ նկարահանող խումբը ցանկացել է այցելել նրանց։
Բնակիչների փոխանցմամբ` երկու ընտանիքից մեկը տարեց ամուսիններ են եղել, իսկ մյուսը` չորս հոգանոց ընտանիք։ Եվս մեկ ընտանիք շարունակում է ապրել Ոսկեպարում։
Հիշեցնենք` Նիկոլ Փաշինյանն այս շաբաթվա սկզբին էր մեկնել Ոսկեպար, Կիրանց և բնակիչներին փոխանցել, որ հնարավոր է Ադրբեջանին հանձնվեն Ոսկեպարի, Կիրանցի և Բաղանիսի հարևանությամբ գտնվող, այսպես կոչված, ադրբեջանական գյուղերը։ Վարչապետն ուղիղ հայտարարել է՝ եթե անգամ հայկական զորքը Բաքվի պահանջած 4 գյուղերից հետ քաշվի սահմանագիծ, Ադրբեջանը հայկական 31 բնակավայրերի տարածքներից միաժամանակ չի նահանջելու։
Եթե այս սցենարը կյանքի կոչվի, ապա Ոսկեպարը երեք կողմից կհայտնվի ադրբեջանական շրջափակման մեջ, որոշ տներ, Երևան-Թբիլիսի մայրուղու` Ոսկեպարով և Կիրանցով անցնող հատվածները կանցնեն թշնամուն։
Այս թեմայով Ոսկեպարից և Կիրանցից Factor TV-ի ռեպորտաժները` վաղը։
Նարեկ Կիրակոսյան
