05.06.2026 | 02:00
ՌԴ-ից մարդկանց ստիպելով բերում են իրենց օգտին քվեարկելու․ Փաշինյանը՝ «Ուժեղ Հայաստանի» մասին․ ՏԵՍՆՅՈՒԹ
Պետրոս Պետոյանը՝ Կենտրոնի թաղապետի պաշտոնում նշանակվելու լուրերի մասին
Քաղաքականություն
16.02.2024 | 12:06
Factor.am-ը երեկ գրել էր, որ Կենտրոն վարչական շրջանի ղեկավար Սամվել Ղուկասյանն առաջիկա օրերին կազատվի աշխատանքից և նրա փոխարեն այդ պաշտոնում կնշանակվի մարքեթինգային ընկերության հիմնադիր Պետրոս Պետոյանը։ Նա երեկ մեզ հետ զրույցում չէր հերքել իր հնարավոր նշանակման մասին տեղեկությունը, սակայն ասել էր՝ ավելի ուշ զանգեք։
Այսօր Պետրոս Պետոյանը Factor․am-ի հետ զրույցում հաստատեց՝ իր նշանակման շուրջ քննարկումներ եղել են։
«Դեռ ոչինչ չեմ կարող ասել, խոսակցություններ եղել են, բայց որոշում չկա, սպասեք պաշտոնական լրահոսին»,- ասաց Պետոյանը։
Երևանի քաղաքապետի մամուլի խոսնակ Հայկ Կոստանյանն էլ Factor.am-ին հայտնեց, որ դեռ հստակ որոշում չկա։
«Այո՛, կան նման քննարկումներ, բայց վերջնարդյունքը դեռ պարզ չէ»,- նշեց Կոստանյանը։
Ճշտող հարցին՝ բացի Պետոյանից արդյո՞ք կան այլ թեկնածուներ, քաղաքապետի մամուլի խոսնակը բացասական պատասխան տվեց։
Իսկ ինչպես է ընտրությունը կանգ առել մարքեթինգային ընկերության հիմնադիր Պետրոս Պետոյանի վրա․ «Դա քաղաքապետի որոշումն է»,- ասաց Հայկ Կոստանյանը։
Իսկ Սամվել Ղուկասյանին քաղաքային իշխանությունն անգործ չի թողնի․ մեր տեղեկություններով՝ նա նշանակվելու է Երևանի քաղաքապետարանի աշխատակազմի քաղաքաշինության և հողի վերահսկողության վարչության պետ․ այս պաշտոնն զբաղեցնող Յակով Ասատրյանը վերջերս է սեփական դիմումի համաձայն ազատվել աշխատանքից։
Արփի Հակոբյան
