Քաղաքականություն
09.02.2024 | 12:23
ԵՄ արտաքին քաղաքական ծառայությունը փետրվարի 7-ին Ադրբեջանում կայացած նախագահական ընտրությունների վերաբերյալ հայտարարություն է տարածել։
Մասնավորապես, նշվում է, որ «փետրվարի 7-ին Ադրբեջանի Հանրապետությունում տեղի են ունեցել արտահերթ նախագահական ընտրություններ։ Դրանք առաջին ընտրություններն էին, որոնք անցկացվել են Ադրբեջանի Հանրապետության ամբողջ տարածքում։ Նախագահ Իլհամ Ալիևը վերընտրվել է իր պաշտոնավարման հինգերորդ ժամկետով»։
«Եվրամիությունն ի գիտություն է ընդունում ԵԱՀԿ/ԺՀՄԻԳ դիտորդական առաքելության նախնական եզրահանգումները և եզրակացությունները։ Ըստ առաքելության՝ ընտրությունները տեղի են ունեցել սահմանափակող քաղաքական միջավայրում, երբ սահմանափակվում են հիմնարար իրավունքներն ու ազատությունները, ներառյալ՝ հավաքների, արտահայտվելու և լրատվամիջոցների ազատությունը»,- ասվում է հայտարարության մեջ։
Նշվում է, որ ընտրությունների օրն անցել է հանգիստ և, ընդհանուր առմամբ, կազմակերպված, սակայն դիտորդներն արձանագրել են պարտադիր ընթացակարգերի համատարած անտեսում, թափանցիկության պակաս և բազմաթիվ լուրջ խախտումներ:
«Եվրամիությունը հաստատում է իր ակնկալիքները, որ Ադրբեջանի իշխանությունները կընդունեն և կկատարեն ԵԱՀԿ/ԺՀՄԻԳ-ի առաջարկություններն այս և նախորդ ընտրությունների հետ կապված: ԵՄ-ն շարունակում է ներգրավված լինել Ադրբեջանի հետ երկխոսության և համագործակցության մեջ՝ ներառյալ լավ կառավարման, մարդու իրավունքների և օրենքի գերակայության հարցերում՝ ի շահ Ադրբեջանի ժողովրդի»,- նշվում է հայտարարության մեջ։
Նախօրեին ԵԱՀԿ/ԺՀՄԻԳ դիտորդական առաքելության ներկայացուցիչները Բաքվում հրավիրված ասուլիսում ներկայացրել էին ընտրությունների նախնական դիտարկումները։ Ըստ դիտորդների՝ արտահերթ նախագահական ընտրություններն անցել են լրջագույն ընտրախախտումներով։ Քվեարկության ընթացքում տեղի ունեցած զանգվածային ընտրախախտումներն ու լցոնումներն արձանագրել էին նաև ադրբեջանական անկախ ու ընդդիմադիր լրատվամիջոցները և դիտորդները։
Էմմա Չոբանյան
