19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
«Նիկոլ Դուման» ձուլարանի ճակատագիրը կորոշի ՇՄ նախարարությունը․ Factor TV-ի հրապարակումից հետո քաղաքապետարանից ու ՄԻՊ գրասենյակից այցելել են արտադրամաս
12.12.2023 | 13:24
Factor TV-ն երկու շաբաթ առաջ անդրադարձել էր Արցախի պողոտայի 23/10 շենքում ձուլարանի շահագործմանը։ Բնակիչները դժգոհել էին՝ մաքուր օդի փոխարեն թույն են շնչում, քանի որ ձուլարանը շահագործվում է իրենց շենքի նկուղային հարկում։
Factor TV-ն տեղեկացավ, որ Քաղաքապետարանից ու ՄԻՊ գրասենյակից այցելել են Արցախի պողոտայի 23/10 հասցե, հետաքրքրվել խնդրով։
Ավագանու հերթական նիստում, երբ «Ազգային առաջընթաց» խմբակցության ղեկավար Արամ Թորոսյանը բարձրաձայնել էր այս խնդրի մասին, քաղաքապետ Տիգրան Ավինյանը փոխքաղաքապետ Արմեն Փամբուխչյանին էր հանձնարարել զբաղվել և հասկանալ՝ ինչպես է ստացվել, որ բնակելի շենքի նկուղային հարկում ձուլարան է շահագործվում։
Քաղաքապետարանից ասացին, որ խնդիրը լուծելու ուղղությամբ քայլեր են իրականացվում։ Քաղաքապետի մամուլի խոսնակ Հայկ Կոստանյանը Factor TV-ին փոխանցեց, որ Անշարժ գույքի կառավարման վարչությունը և Էրեբունի վարչական շրջանի ղեկավարն այցելել են ձուլարանի տարածք, խոսել բնակիչների ու բնակելի շենքում շահագործվող «Նիկոլ Դուման» ձուլարանի նախագահ Կառլեն Գևորգյանի հետ։
«Բողոքը երկու քաղաքացու կողմից է եղել, և մենք պարտավոր ենք խնդրի հետևից գնալ։ Դիմել ենք Շրջակա միջավայրի նախաարություն, որպեսզի մասնագետները հասկանան՝ որքանո՞վ է այնտեղ աղտոտված, ինչ աստիճանի է, վնաս հասցնո՞ւմ է բնակիչներին, թե՞ ոչ։ Երբ պարզվի, որ այդտեղ, իրոք, խնդիր կա, ձուլարանը շահագործողը պիտի նվազեցնի դա կամ կարող է ընդհուպ փակելու խնդիր առաջանալ։ Բնապահպանության և ընդերքի տեսչական մարմնի ստուգումներից հետո միայն մենք կկարողանանք որոշակի գործողություններ անել»,- մանրամասնեց Կոստանյանը։
Մարդու իրավունքների պաշտպան Անահիտ Մանասյանի մամուլի խոսնակ Արթուր Ասլանյանն էլ Factor TV-ին հայտնեց, որ ուսումնասիրություն է սկսվել։
«Ձեր կողմից հիշատակված խնդրի առնչությամբ Մարդու իրավունքների պաշտպանի աշխատակազմում որևէ դիմում-բողոք չի ստացվել: Միևնույն ժամանակ, տեղեկացնենք, որ պաշտպանի սեփական նախձեռնությամբ սկսվել է ուսումնասիրություն, պարզաբանումներ ստանալու նպատակով գրություններ կհասցեագրվեն պետական իրավասու մարմիններին»,- ասաց Ասլանյանը։
Արփի Հակոբյան
