Ամենակատարյալ Սահմանադրության պարագայում ոչ ոք երաշխիք չունի, որ ինչ-որ խմբի կողմից տեղի չի ունենա իշխանության զավթում․ Արթուր Սաքունց․ ՏԵՍԱՆՅՈՒԹ

ՀՔԱ Վանաձորի գրասենյակի ղեկավար Արթուր Սաքունցի համոզմամբ՝ նույնիսկ ամենակատարյալ Սահմանադրության պարագայում ոչ ոք երաշխիք չունի, որ ինչ-որ խմբի կողմից տեղի չի ունենա իշխանության զավթում, պարզապես, կան մի քանի կարևոր սկզբունքներ, որոնք ոչ միայն պետք է ամրագրված լինեն Սահմանադրության մեջ, այլ գործեն, որպես քաղաքական մշակույթի անբաժան մաս։ Այս մասին այսօր «Վերահսկելի և պատասխաանտու իշխանություն ձևավորելու անհրաժեշտություն․ չկա անձեռնմխելի իշխանություն» թեմայով քննարկման ժամանակ ասաց Արթուր Սաքունցը՝ մտահոգություն հայտնելով, այն մասին, որ ներկայիս Կառավարության ժողովրդավար կեցվածքն անգամ չի կարող երաշխիքներ տալ։ 

«Անհրաժեշտ ենք համարում բարձրաձայնել, որ գործող Սահմանադրությունը չի ապահովում իշխանությունների տարանջատման սկզբունքը։ Այն կառավարման համակարգը, որն ունենք, կարգավորվում է սուպերվարչապետության իրավական նորմերով։ Ես վստահ եմ, որ Նիկոլ Փաշինյանը ոչ մի դատավորի չի զանգի և բան ասի, բայց դրա համար պետք է ստեղծվի իրավական հիմք»,- ասաց Արթուր Սաքունցը՝ ընդգծելով, որ նման փոփոխությունների համար քաղաքացիական հասարակությունը ցանկանում է տեսնել հստակ ուղերձներ, որով ԱԺ առաջիկա ընտրություններից հետո սուպերվարչապետության փոփոխության ուղղությամբ կկատարվեն օրենսդրական փոփոխություններ։ 

«Իշխանությունը խիստ գայթակղիչ երևույթ է։ Մենք պետք է ապահովենք թավշյա հեղափոխության հիմքում ընկած արդարության ապահովման երաշխիքները»,-ասաց Արթուր Սաքունցը։

Մանրամասները՝ տեսանյութում։