25.04.2026 | 11:11
Արտարժույթների փոխարժեքները՝ ապրիլի 25-ի դրությամբ
20 տուժող, մեղադրյալ չկա․ Եռաբլուրի գործով ոստիկանների նկատմամբ քրեական հետապնդում չի հարուցվի. ՏԵՍԱՆՅՈՒԹ
Հասարակություն
16.11.2023 | 20:10
«Եռաբլուրի գործով» ոստիկանների նկատմամբ քրեական հետապնդում չի հարուցվի հանցակազմի բացակայության հիմքով, հայտնում է գործով ծնողների ներկայացուցիչ Վահան Հովհաննիսյանը։ Հովհաննիսյանը ֆեյսբուքի գրառմամբ նաև նշում է, որ ծանոթացման նպատակով գործով ներկայացուցչին են տրամադրվել քրեական վարույթի նյութերը։
Իրավապաշտպան Նինա Կարապետյանցի համար կանխատեսելի էր քրեական հետապնդում չհարուցելու որոշումը։ Նրա խոսքով՝ ակնհայտ է նաև, որ այս ամենը քաղաքական որոշում է։ Կարապետյանցը հիշեցնում է՝ միջադեպից հետո գործադիր և օրենսդիր մարմինների մի շարք ներկայացուցիչներ շնորհակալություն էին հայտնում Ոստիկանությանը բացառիկ պրոֆեսիոնալ աշխատանքի համար, և ակնհայտ էր, որ այդ ամենից հետո որևէ մեկը չէր կարող պատասխանատվության ենթարկվել։
Վերջին տարիներին ստեղծվել է մի իրավիճակ, որ թե՛ ցուցարարների նկատմամբ բռնություն գործադրող ոստիկանները, թե՛ բաժիններում բռնություն գործադրող, խոշտանգումներ իրականացրած ոստիկանններն ընդհանրապես չեն պատժվում և երբեմն նույնիսկ խրախուսվում են՝ ասում է «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը։
Նրա համար ևս զարմանալի չէ «Եռաբլուրի գործով» ոստիկանների նկատմամբ քրեական հետապնդում չհարուցելու որոշումը։
Ազգային ժողով-Կառավարություն հարցուպատասխանի ընթացքում երեկ ներքին գործերի նախարար Վահե Ղազարյանը խորհրդարանի ամբիոնից անդրադառնալով Ոստիկանության կողմից ուժի կիրառման դեպքերին՝ պնդեց, թե Ոստիկանությունը երբևիցե նման գրագետ ձևով չի աշխատել։
Նինա Կարապետյանցը հիշեցնում է նաև վերջին շրջանում համացանցում բռնության կոչերի համար հարուցված քրեական գործերն ու կալանավորումները, այն դեպքում, երբ Ազգային ժողովում իշխանության ներկայացուցիչները պարբերաբար սպառնալիքներ են հնչեցնում, բայց այդպես էլ նրանցից ոչ մեկը չի ենթարկվել պատասխանատվության։
Հիշեցնենք, որ 2022-ի սեպտեմբերի 21-ին՝ ՀՀ Անկախության օրը վաղ առավոտյան Ոստիկանության ծառայողներն անհամաչափ բռնի ուժի գործադրմամբ «Եռաբլուր»-ից բերման էին ենթարկել 37 քաղաքացու՝ զոհված զինծառայողների հարազատների, որոնք փորձում էին թույլ չտալ Նիկոլ Փաշինյանին մուտք գործել զինվորական պանթեոն։
Փաստի առթիվ հարուցված քրեական գործով որևէ անձ մեղադրյալի աթոռին չի հայտնվել, այնինչ տուժող է ճանաչվել ծնողներից 20-ը։ Ոստիկանությունն իր հերթին Վարչական դատարան էր դիմել՝ զինծառայողների հարազատներին վարչական պատասխանատվության ենթարկելու համար։
Մանրամասները՝ տեսանյութում։
Անի Թամրազյան
