05.08.2026 | 19:43
Ջրափրկարարները 5-ամյա երեխային անվտանգ դուրս են բերել ափ
Ինչ է գրված եղել ՔՊ նախընտրական ծրագրում 2021-ին․ Խանդանյանի պնդումն իրականությանը չի համապատասխանում
Քաղաքականություն
18.10.2023 | 18:53
«2020 թվականի պատերազմից հետո, սա բազմիցս ենք ասել, որ ՀՀ-ն Լեռնային Ղարաբաղում ներկայություն չի ունեցել, ո՛չ քաղաքական, ո՛չ ռազմական, անվտանգության երաշխավորը եղել է ռուս խաղաղապահ առաքելությունը»,- այսօր խորհրդարանում լրագրողների հետ ճեպազրույցում նման հայտարարություն արեց ՀՀ ԱԺ արտաքին հարաբերությունների հանձնաժողովի նախագահ, ՔՊ խմբակցության պատգամավոր Սարգիս Խանդանյանը։
Factor TV-ի դիտարկմանը, որ ՔՊ-ն 2021 թվականին տեղի ունեցած արտահերթ ընտրություններին ընդառաջ ներկայացրած նախընտրական ծրագրում հավաստիացրել էր, որ լինելու է Արցախի անվտանգության երաշխավորը, Սարգիս Խանդանյանն արձագանքեց․ «Անվտանգության երաշխավորի մասին չի եղել ․․․ որ հետամուտ կլինի Լեռնային Ղարաբաղի հակամարտության խաղաղ կարգավորման»։
Խանդանյանի այս պնդումն իրականությանը չի համապատասխանում։ Մասնավորապես, նախընտրական ծրագրի «Արցախի հիմնախնդիր» բաժնում գրված է․ «Հայաստանի Հանրապետությունը շարունակելու է լինել Արցախի ժողովրդի անվտանգության երաշխավորը և շարունակելու է աշխատել Արցախի ժողովրդի իրավունքների պաշտպանության ուղղությամբ: Խորացնելու ենք համագործակցությունը Արցախի հետ անվտանգային և ռազմական ոլորտներում: Մենք գործուն օժանդակություն ենք ցուցաբերելու Արցախին՝ Պաշտպանության բանակի վերակառուցման ու արդյունավետության բարձրացման գործընթացում»,- ասված էր ՔՊ նախընտրական ծրագրում։
Չի բացառվում, որ Փաշինյանին և իր թիմին արտահերթ ընտրություններում իրենց քվեն տվածների մի ստվար մասը քվեարկել է՝ հաշվի առնելով նաև ՀՀ-ի՝ Արցախի անվտանգության երաշխավոր լինելու խոստումը։
Ի դեպ, նշենք, որ ՔՊ-ն իր ծրագրերում անքան հեռուն էր գնացել, որ Շուշիի և Հադրութի ազատագրման խոստումներ էր տվել։
«Բանակցային գործընթացում Հայաստանի առաջնահերթություններից է լինելու այն տարածքների դեօկուպացիան, որի վրա ինքնորոշվել է Արցախի ժողովուրդը, նախևառաջ նախկին ԼՂԻՄ բնակավայրերի վերադարձն Արցախի վերահսկողության ներքո՝ խաղաղ, բանակցային ճանապարհով, ինչը հնարավորություն կտա տեղահանված անձանց վերադառնալ իրենց տները»,-նշված է նախընտրական ծրագրում:
Այնինչ վերջին երկու տարիների ընթացքում ականատես եղանք, ոչ թե Արցախի տարածքների դեօկուպացիային, այլ Նիկոլ Փաշինյանի կողմից Ադրբեջանի տարածքային ամբողջականություն ճանաչելուն։
Նարեկ Կիրակոսյան
