«Օզյում եմ շուտ դպրոց քինամ, ընկերներ ճարիմ»․ արցախցիների ուսման հարցին հերթը դեռ չի հասնում․ ՏԵՍԱՆՅՈՒԹ

Լեռնային Ղարաբաղում գործել է 108 հանրակրթական ուսումնական հաստատություն՝ շուրջ 21 հազար սաներով։ Սահմանը հատող յուրաքանչյուր երրորդ քաղաքացի անչափահաս է։ ԿԳՄՍ նախարար Ժաննա Անդրեասյանն օրերս հայտնեց, որ Հայաստանի կրթական համակարգը պատրաստ է ընդունել տեղահանվածներին։

Արամ Առուստամյանը շուշեցի է․ 2020-ից հետո ընտանիքի հետ ապրում էր Ստեփանակերտում։ Բռնի տեղահանման պատճառով արդեն երկրորդ անգամ է տուն կորցնում։ 5-րդ դասարանցի այս տղան ընտանիքի հետ այժմ Երևանում է։ Ո՛չ ինքը, ո՛չ քույր-եղբայրները չեն կարողացել իրենց հետ վերցնել դասագիրք կամ գրենական պիտույքներ։ Դպրոց դեռ չեն գնում․ ուսման հարցը կլուծեն, երբ կացարանի խնդիրը լուծվի։

«Ես օզյում եմ մեր տան կողքին լինի դպրոցը, շուտ քյինանք, ուշանանք ոչ։ Օզյում եմ ստեղ ընկերներ ճարիմ, խաղամ»,- ասում է նա։

Ռուզաննան սկեսրոջ հետ Ստեփանակերտի հիվանդանոցում էր, երբ Ադրբեջանը սկսեց հրետակոծությունը։ Այդ օրը, բարեբախտաբար, ամուսնուն խնդրել էր երեխաներին նախատեսվածից շուտ դպրոցից տանել տուն։ Նա որդու ընդունելության համար դեռ որևէ դպրոց չի դիմել։ Մտածում է՝ գուցե փոխեն բնակության վայրը, չի ցանկանում, որ որդին նորից դպրոց փոխի։

Ի դեպ, Արցախից տեղահանված դպրոցականները հայաստանյան դպրոցներ ընդունվելու համար կարող են դիմել տվյալ մարզպետարանի կրթության վարչություն, համայնքապետարան կամ մոտակա դպրոց։

12-ամյա Միլենան ամեն օր մայրիկին խնդրում է իրեն արագ տեղավորել Երևանի դպրոցներից մեկում։ Նա սովորականի պես դպրոցում էր, երբ Ստեփանակերտում հրետակոծություն սկսվեց։ Միլենայի քույրն է եկել և տարել նրան ուրիշ շենքի նկուղ, որտեղ մնացել են երկու օր։ Ասում է՝ երբ արկեր էին պայթում, արդեն չէր վախենում․ սովոր էր դրանց ձայներին։ Միլենայի ամենամեծ ցանկություններից մեկը հնարավորինս արագ նոր դասընկերներ գտնելն է։

Արցախից տեղահանված այն դպրոցականները, որոնք իրենց հետ չեն վերցրել որևէ փաստաթուղթ, կարող են դիմել դպրոց, և ընդունելությունը, միևնույն է, կկազմակերպվի առանց խոչընդոտի՝ հավաստիացնում են պատասխանատուները։ Էլեկտրոնային տեղեկատվական համակարգում գործում է նաև առանձին էջ, որտեղ արցախցի տեղահանված դպրոցականները կարող են հերթագրվել՝ դարձյալ առանց փաստաթղթային պահանջի։

Նրանց դասագրքերով ապահովելու խնդիրը ևս, Ժաննա Անդրեասյանի խոսքով, կարգավորվում է․ դպրոցները, որոնք լրացուցիչ դասագրքեր ունեն, կարող են դրանք տրամադրել այլ դպրոցների, որոնք դասագրքերի պակաս ունեն։ Հնարավոր է՝ թողարկվի նաև դասագրքերի լրացուցիչ խմբաքանակ։

Մանրամասները՝ տեսանյութում։

Աննա Բաբաջանյան