Արցախում քննարկում են բնակչությանը Գորիս տեղափոխելու հարցը

Արցախում քննարկում են մարդկանց Գորիս տեղափոխելու հարցը։ Այս մասին Factor.am-ի հետ զրույցում հայտնեց Արցախի ԱԺ պատգամավոր Մետաքսե Հակոբյանը։

«Հիմա առաջնային խնդիրը բոլորի անվտանգությունն ապահովելն է՝ թե՛ գնալու առաջնահերթ ցանկություն հայտնողների, թե՛ չհայտնողների։ Դա պիտի համակարգված արվի, այսինքն՝ հնարավոր չէ, որ մի խումբը գնա, մյուս խումբը մնա, այդպես չի կարող լինել։ Դա պետք է ընդհանուր որոշմամբ և համակարգված լինի, չի կարող այնպես լինել, որ քաոսային, տեղային որոշումներ կայացվեն։ Երեկվանից հենց այդ գործընթացն է տեղի ունենում, քննարկվում է՝ ինչպես համակարգել թե՛ գնացողների, թե՛ մնացողների անվտանգությունը։ Այլ կերպ դա ուղղակի քաոսի կվերածվի»,- մանրամասնեց պատգամավորը։

Մետաքսե Հակոբյանի խոսքով՝ Արցախում իրավիճակը ծայրահեղ ծանր է, մարդիկ փողոցներում են գիշերում։

«Մարդիկ փողոցներում են, որովհետև այլևս տեղ չկա՝ ո՛չ դպրոցներում, ո՛չ հյուրանոցներում․ ազատ շենք չկա։ Դպրոցներում մարդիկ գետնին են պառկում, բնակիչները, անհատները, խանութների սեփականատերերը տաք վերմակ, հագուստ, ներքնակ, սնունդ տանում են, պետությունն ինչքան հնարավորություն ունի՝ օգնում է, ճաշարաններ են բացել, տեղում սնունդ է տրվում, բայց դա, միևնույն է, որևէ կերպ չի թեթևացնում իրավիճակը, ծայրահեղ ծանր քաոսային իրավիճակ է, որը դեռևս կառավարելի է»,- ասաց Հակոբյանը։

Նշենք, որ երեկ ԿԽՄԿ-ի և ռուս խաղաղապահների կողմից Արցախ է հասցվել 215 տոննա հումանիտար բեռ։ Մետաքսե Հակոբյանն ասաց՝ այդ օգնությունը բաժանվում է ոչ թե մարդկանց, այլ ճաշարաններին։

Արփի Հակոբյան