30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԼՂ-ի բնակչության բռնի տեղահանումը ռազմական կամ այլ միջոցներով կարժանանա ԵՄ-ի խիստ արձագանքին․ Բորելը՝ Ադրբեջանին
Քաղաքականություն
21.09.2023 | 20:30
ԵՄ-ն դատապարտում է Ադրբեջանի ռազմական գործողությունը Լեռնային Ղարաբաղի հայ բնակչության դեմ և ափսոսանք է հայտնում այդ ամենի հետևանքով զոհերի և կորուստների համար։ Այս մասին ասվում է ԵՄ արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելի հայտարարության մեջ։
«Մենք ի գիտություն ենք ընդունել համապատասխան հայտարարությունները, որ ձեռք է բերվել հրադադարի պայմանավորվածություն։ Մենք ակնկալում ենք ռազմական գործողությունների անհապաղ և ամբողջական դադարեցում ու հրադադարի պահպանում։ ԵՄ-ն կոչ է անում Ադրբեջանին՝ թույլատրել անհապաղ ու անարգել հումանիտար օգնություն կարիքավոր մարդկանց, այդ թվում՝ Լաչինի միջանցքի ամբողջական բացման միջոցով՝ ՄԱԿ-ի Արդարադատության միջազգային դատարանի փետրվարի ու հուլիսի որոշումների համաձայն։ Մարդասիրական դերակատարները պետք է կարողանան ազատորեն գործել։ ԵՄ-ն և նրա անդամ երկրները պատրաստ են հրատապ մարդասիրական օգնություն ցուցաբերել»,- ասվում է հայտարարության մեջ։
ԵՄ-ն Բաքվին և Արցախի հայերին կոչ է անում հրատապ ներգրավվել համապարփակ և թափանցիկ երկխոսության մեջ։
«Ադրբեջանը պատասխանատվություն է կրում ապահովելու Ղարաբաղի հայերի իրավունքները և անվտանգությունը, այդ թվում՝ առանց ահաբեկման և խտրականության իրենց տներում ապրելու իրավունքը։ Քաղաքացիական բնակչության բռնի տեղահանումը ռազմական կամ այլ միջոցներով կարժանանա ԵՄ-ի խիստ արձագանքին։ ԵՄ-ն պատրաստ է ձեռնարկել համապատասխան գործողություններ՝ իրավիճակի հետագա վատթարացման դեպքում»,- ասվում է հայտարարության մեջ։
ԵՄ-ն նաև վերահաստատում է իր աջակցությունը ինչպես Ադրբեջանի, այնպես էլ Հայաստանի ինքնիշխանությանը և տարածքային ամբողջականությանը, և կոչ է անում Ադրբեջանին վերահաստատել իր միանշանակ հավատարմությունը Հայաստանի տարածքային ամբողջականությանը՝ 1991 թվականի Ալմաթիի հռչակագրի համաձայն։
Նշվում է, որ ԵՄ-ն պատրաստ է հետագայում էլ աջակցել Հայաստանի ժողովրդավարական ճանապարհով ընտրված իշխանություններին՝ երկրում ժողովրդավարական բարեփոխումների կայունությանը, անվտանգությանը և շարունակմանը։ Հայաստանում Եվրոպական միության առաքելությունը շարունակելու է դիտարկել և զեկուցել Ադրբեջանի հետ միջազգային սահմանի հայկական կողմում անվտանգության իրավիճակի մասին։
«ԵՄ-ն կոչ է անում վերսկսել Հայաստանի և Ադրբեջանի միջև բանակցությունները բոլոր առկախված հարցերի շուրջ՝ հաշվի առնելով խաղաղության պայմանագրի կնքումը, և լիովին հավատարիմ է մնում նման բանակցություններին աջակցելուն: ԵՄ-ն լիովին հավատարիմ է կողմերի միջև երկխոսությունը հեշտացնելուն, հատկապես՝ Եվրոպական խորհրդի նախագահի հովանու ներքո՝ ԵՄ հատուկ ներկայացուցչի աջակցությամբ, երկարատև խաղաղություն ապահովելու համար՝ ի շահ տարածաշրջանի բոլոր մարդկանց»,- ասվում է Բորելի հայտարարության մեջ։
Էմմա Չոբանյան
