ՔՊ-ի կազմում առաջադրվելուց հետո սպառնալից նամակներ եմ ստացել․ Վահագն Հայրապետյան. ՏԵՍԱՆՅՈՒԹ

«Առաջադրվելուց հետո շատ քննադատություններ են հնչել իմ հասցեին, նույնիսկ ահաբեկող նամակներ եմ ստացել։ Ոմանք իրենց պարտքն են համարում դրսից հեռակառավարման վահանակով հայրենիք կառավարել ու սիրել․ այդպես հեշտ է։ Մարդիկ կան, որոնք ժամանակին իրենց ընկեր են կոչել, հետո այդ ընկերներին էլ տեսա: Երբ իրենց պետք չես, այլևս իրենց ընկերը չես»,- Factor TV-ի հետ զրույցում նշում է ջազ երաժիշտ, դաշնակահար և կոմպոզիտոր Վահագն Հայրապետյանը, որը Երևանի ավագանու առաջիկա ընտրություններին «Քաղաքացիական պայմանագիր» կուսակցության նախընտրական ցուցակում է։

Ջազմենը շեշտում է, որ առաջարկը ստացել է ՔՊ-ից, և ընդունել է այն պատճառով, որ մտահոգ է քաղաքային կյանքով, և սիրում է Երևանը՝ ոչ միայն երգերի ու կենացների մակարդակով:

«Սա փորձ է մայրաքաղաքում դրական փոփոխություններ անելու: Առհասարակ, մշակույթի գործիչը չէ, որ հարում է իշխանությանը, այլ իշխանությունն է հարում մշակույթի գործչին։ Բոլոր իշխանությունների օրոք ես նույն մարդն եմ եղել»,- նշում է նա։

Վահագն Հայրապետյանի խոսքով՝ առաջնային խնդիրներից մեկը, որ պետք է լուծել Երևանում, փողոցային երաժշտության կարգավորումն է․ «Չէի ուզենա, որ մայրաքաղաքում փողոցային անորակ երաժշտություն հնչեր, փողոցում նվագող երաժիշտն էլ ունենար մուրացկանի կարգավիճակ։ Այդ ամենը պետք է լինի քաղաքապետարանի հսկողության ներքո, փողոցային երաժիշտները պետք է ունենան իրենց ժամը, պետք է թույլտվություն ստանան և լիցենզավորվեն։ Չի կարող այնպես լինել, որ ով ուզենա՝ գնա փողոցում նվագի»:

Մանրամասները՝ տեսանյութում։

Աննա Բաբաջանյան