18.02.2026 | 23:28
Ստեփանծմինդա-Լարս ավտոճանապարհը փակ է
Հայաստանի և ԱՄՆ-ի զորավարժությունները չեն օգնի տարածաշրջանում իրավիճակի կայունացմանը․ Պեսկով
Քաղաքականություն
07.09.2023 | 14:57
ՌԴ նախագահի մամուլի քարտուղար Դմիտրի Պեսկովը կրկին անդրադարձել է Հայաստանի և ԱՄՆ-ի համատեղ զորավարժությունների թեմային՝ նշելով, որ դրանց անցկացումը չի նպաստում տարածաշրջանում իրավիճակի կայունացմանը, փոխանցում է ՏԱՍՍ-ը։
«Այս իրավիճակում, իհարկե, նման զորավարժությունների անցկացումը չի նպաստում իրավիճակի կայունացմանը։ Ամեն դեպքում, չի նպաստում տարածաշրջանում փոխվստահության մթնոլորտի ամրապնդմանը»,- լրագրողներին ասել է Պեսկովը՝ մեկնաբանելով ՀՀ վարչապետ Նիկոլ Փաշինյանի այսօրվա հայտարարությունը, որ տարածաշրջանում ռազմաքաղաքական իրավիճակը սրվել է։
Բացի այդ, նա նշել է, որ Ռուսաստանն աշխատում է և՛ Հայաստանի, և՛ Ադրբեջանի հետ՝ կարգավորելու երկրների միջև ստեղծված իրավիճակը։
«Ռուսաստանը շարունակում է կատարել երաշխավորի իր գործառույթը։ Ռուսաստանը շարունակում է շատ ուշադիր, բծախնդիր աշխատանքը, հետևողական, կառուցողական աշխատանքը ինչպես Երևանի, այնպես էլ Բաքվի հետ»,- ասել է Պեսկովը։
Նշենք, որ նախօրեին էլ նա հայտարարել էր, թե Հայաստանի տարածքում հայ-ամերիկյան համատեղ զորավարժություններ անցկացնելու մասին տեղեկատվությունը մտահոգություն է առաջացնում, և որ Մոսկվան խորապես վերլուծելու է այս իրավիճակն ու հետևելու է զարգացումներին։
Հիշեցնենք՝ ՀՀ ՊՆ-ն ավելի վաղ հաղորդել էր, որ Միջազգային խաղաղապահ առաքելություններում մասնակցության նախապատրաստման շրջանակում սեպտեմբերի 11-20-ը Հայաստանում՝ ՊՆ խաղաղապահ բրիգադի «Զառ» ուսումնական կենտրոնում և ՊՆ N ուսումնական կենտրոնում, անցկացվելու են «Արծիվ գործընկեր 2023» հայ-ամերիկյան համատեղ զորավարժությունները։
Էմմա Չոբանյան
