21.02.2026 | 15:17
Օդի ջերմաստիճանը ողջ հանրապետությունում կնվազի ևս 5-8 աստիճանով
Անհետ կորած զինծառայողի ծնողն ահազանգում է՝ պաշտպանության փոխնախարարի հետ քաշքշուկ է եղել, ՊՆ-ից հերքում են
Հասարակություն
30.08.2023 | 18:18
Էջմիածնի «Քիմիկների զորամասի» անհետ կորած զինծառայողների ծնողներն այսօր առավոտից Պաշտպանության նախարարությունում են։ Նրանք ցանկանում են հանդիպել նախարար Սուրեն Պապիկյանի հետ, բայց ծնողներից Կարինե Մանավազյանը Factor.am-ի հետ զրույցում ասաց, որ փոխանցել են՝ Պապիկյանը հանդիպման է, չի կարող ընդունել։
«Ամեն անգամ խաբելով, տշելով դեսուդեն՝ չի ընդունում։ Հիմա մենք եկել ենք, չի ընդունել Պապիկյանը, ընդունել է փոխնախարար Արման Սարգսյանը, որը ոչ մի բան չի ասել։ Լուրջ խնդիր ունենք հիմա, այն աստիճանի, որ հրմշտոց, քաշքշուկ է եղել։ Մենք նստելու ենք այստեղ այնքան, մինչև Պապիկյանը մեզ ընդունի»,- ասաց Կարինե Մանավազյանը։
Պաշտպանության նախարարության մամուլի խոսնակ Արամ Թորոսյանը մեր հարցին ի պատասխան ասաց․
«Քաշքշուկի մասին տեղեկությունները չեն համապատասխանում իրականությանը: Ծնողները հանդիպել են պաշտպանության նախարարի տեղակալ Արման Սարգսյանի հետ, այժմ ընթացքի մեջ է ԲՀԱ վարչության պետի հետ հանդիպումը, պաշտպանության նախարարի տեղակալը ծնողներին հայտնել է պաշտպանության նախարարի պատրաստակամությունը՝ առաջիկայում անհատական հանդիպումներ ունենալ ծնողների հետ»։
Հիշեցնենք, որ մեկ ամիս առաջ ծնողները փակել էին Բաղրամյան պողոտան՝ պահանջելով վարչապետ Նիկոլ Փաշինյանի հետ հանդիպում, որն այդպես էլ չկայացավ։ Փաշինյանի փոխարեն նրանց հետ հանդիպեց փոխոստիկանապետ Վարդան Վարդանյանը, բանակցեցին, որից հետո ավելի քան 8 ժամ փակ պահված փողոցը բացվեց։
Արփի Հակոբյան
