14.09.2026 | 13:45
Էդգար Ղազարյանի ճեպազրույցը. ՈՒՂԻՂ
Փաստաբանները դեպի ՆԳՆ շենք երթ են սկսել
Հասարակություն
11.07.2023 | 11:55
Փաստաբանների պալատից քիչ առաջ մեկնարկեց դեպի ՆԳՆ շենք փաստաբանների երթը: Նրանք պահանջում են ՆԳՆ ոստիկանության պետ Արամ Հովհաննիսյանի հրաժարականը։
Նշենք, որ այսօրվանից փաստաբանները նաև եռօրյա գործադուլ են սկսել՝ հրաժարվելով Հայաստանի պետական մարմիններում (այդ թվում՝ դատարաններում, նախաքննության մարմիններում) պաշտպանություն կամ ներկայացուցչություն իրականացնելուց։ Փաստաբաններն այսպիսով իրենց դժգոհությունն են հայտնում ոստիկանության բաժնում վերջին ամիսների ընթացքում տեղի ունեցած բռնության դեպքերի առնչությամբ։
2023 թվականի ընթացքում փաստաբանների նկատմամբ ոստիկանության բաժիններում բռնության վերաբերյալ երկու ահազանգ է ստացվել։ Փետրվարին փաստաբաններ Մարզպետ Ավագյանն ու Էմանուել Անանյանը հայտնել են ոստիկանության Էրեբունու բաժնում իրենց նկատմամբ ենթադրյալ բռնություն գործադրելու մասին։ Հունիսին էլ փաստաբան Կարեն Ալավերդյանն է ահազանգել իր նկատմամբ ոստիկանության Կենտրոնի բաժնում բռնության մասին։
Հունիսի 26-ին փաստաբանները մեկօրյա գործադուլ էին հայտարարել և Փաստաբանների պալատից քայլերթով շարժվել դեպի ոստիկանության Կենտրոնի բաժին, որտեղ բռնցքամարտի ձեռնոցներ էին թողել՝ կից գրությամբ․ «Ոստիկանության կենտրոնական բաժնի (բռնա)պետին»:
Այդ ժամանակ փաստաբանները նաև ՆԳՆ ոստիկանության պետի հրաժարականի պահանջ են ներկայացրել, որը չի կատարվել, ուստի նրանք դիմում են ավելի լուրջ գործողության՝ եռօրյա գործադուլի։
Արաքս Մամուլյան
