Քաղաքականություն
06.07.2023 | 18:56
Այսօր Սումգայիթի ծանր հանցագործությունների դատարանում շարունակվել է առևանգված հայ զինծառայողներ Հարություն Հովագիմյանի և Կարեն Ղազարյանի ապօրինի դատավարությունը։ Բաքուն նրանց անհիմն մեղադրում է պետական սահմանի խախտման և, իբր, ծանր հանցագործություններ կատարելու համար։
Ըստ ադրբեջանական լրատվամիջոցների՝ դատավոր Ֆահմին Գումբատովի նախագահությամբ տեղի ունեցած դատավարության ժամանակ ելույթ են ունեցել փաստաբանները։ Ելույթով է հանդես եկել նաև դատախազը, որը պահանջել է հայ զինծառայողների 12 տարվա ազատազրկման դատապարտել։
Դատավորները հեռացել են խորհրդակցական սենյակ։ Դատավճիռը կհրապարակվի վաղը։
Հիշեցնենք, որ մայիսի 26-ին մարտական դիրքեր սնունդ մատակարարող երկու հայ զինծառայողների հետ կապն ընդհատվել էր: Մայիսի 27-ին ՀՀ Պաշտպանության նախարարությունը հայտնել էր, որ միջդիրքային ճանապարհին հայտնաբերվել է թիկունքային մատակարարման ավտոմեքենան, որում եղել է նաև զինվորներից մեկին ամրակցված զենքը: Քննչական կոմիտեից ավելի ուշ տեղեկացրել էին, որ Ադրբեջանի զինված խումբը հատել է սահմանը և առևանգել հայ զինծառայողներին:
Էմմա Չոբանյան
