Արմեն Աշոտյանը կալանավորվեց

Հակակոռուպցիոն դատարանը որոշեց 2 ամսով կալանավորել Կրթության և գիտության նախկին նախարար Արմեն Աշոտյանին։ Հիշեցնենք, որ ըստ Քննչական կոմիտեի՝ Աշոտյանը, քրեական գործով մեղադրյալ լինելով, խախտել է իր նկատմամբ ընտրված, ազատազրկման հետ չկապված խափանման միջոցի պայմանն ու փորձել խոչընդոտել գործի քննությանը։ Երեկ, նախագահությամբ դատավոր Սարգիս Դադոյանի, Հակակոռուպցիոն դատարանում քննվել է Աշոտյանին կալանավորելու միջնորդությունը։

Կալանավորման միջնորդության քննությանը զուգահեռ դատարանի դիմաց հավաքվել են քաղաքական, հասարակական գործիչներ, որոնք պնդում են, որ Աշոտյանը քաղբանտարկյալ է։ Հիշեցնենք, որ Արմեն Աշոտյանը մեղադրվում է Երևանի Մխիթար Հերացու անվան պետական բժշկական համալսարանում ենթադրյալ չարաշահումների գործով։

Քննչական կոմիտեն երեկ հաղորդագրություն էր տարածել որում, մասնավորապես, ասված էր․ «Քրեական վարույթի ընթացքում Ա.Աշոտյանի նկատմամբ որպես խափանման միջոց էր կիրառվել բացակայելու արգելքը: Սակայն հետագա նախաքննության ընթացքում իրականացված գաղտնի քննչական գործողությունների արդյունքում պարզվել է, որ մեղադրյալ Ա.Աշոտյանն իր նկատմամբ կիրառված խափանման միջոցի առկայության պայմաններում, չի կատարել ՀՀ քրեական դատավարության օրենսգրքով իր վրա դրված պարտականությունները և խոչընդոտել է քրեական վարույթին` ապօրինի միջամտելով ապացուցման գործընթացին: Մասնավորապես, Ա.Աշոտյանը, անձամբ կամ միջնորդավորված, վարույթով վկաների և մեղադրյալների հետ վստահելի հարաբերությունների մեջ գտնվող իր մտերիմների միջոցով առաջարկել և փորձել է այդ անձանց հետ հարցաքննության ուղարկել իր կողմից ընտրված փաստաբանների, որպեսզի կարողանա տեղեկանալ հարցաքննությունների բովանդակություններին՝ միաժամանակ պլանավորելով ու նախատեսելով իր և այդ անձանց հետագա գործողությունները»:

Արաքս Մամուլյան