Տեղ գյուղի մոտ Ադրբեջանի զինուժի սադրանքի մանրամասները․ Աշոտյանը ձերբակալվել է․ Լուրեր

• Ադրբեջանն այսօր միանգամից մի քանի ուղղություններով հարձակումներ և սադրանքներ է նախաձեռնել Սյունիքի Տեղ գյուղի հատվածում, որտեղով անցնում է Հակարիի կամուրջը։ ԱԱԾ-ց հայտնել են, որ ժամը 08:40-ի սահմաններում, Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ են կատարել՝ ՀՀ տարածքում դրոշ տեղադրելու նպատակով։ Հայկական կողմի ձեռնարկած միջոցների արդյունքում ադրբեջանցի զինծառայողների առաջխաղացման և ՀՀ տարածքում դրոշ տեղադրելու փորձը կանխվել է: Բաքուն հայտնել է, թե այդ ընթացքում ադրբեջանական զինուժի մեկ զինծառայող վիրավորվել է։ Այնուհետև որոշ ժամանակ իրավիճակը այդ հատվածում հանգիստ է եղել։
• Ավելի ուշ ՀՀ ՊՆ-ից հայտնել են, որ ժամը 11:45-ին, Ադրբեջանի ԶՈՒ ստորաբաժանումները կրակ են բացել Տեղի հատվածում տեղակայված հայկական դիրքերի ուղղությամբ՝ կիրառելով նաև ականանետ: ԱԱԾ-ից էլ հայտնել են, որ ժամը 13:35-ին, Տեղի հատվածում Ադրբեջանի ԶՈՒ կրակի հետևանքով վիրավորում է ստացել ԱԱԾ սահմանապահ ծառայության զինծառայող:
• Արցախի տեղեկատվական շտաբից հայտնել են, որ Հակարիի կամրջի մոտ տեղի ունեցած ադրբեջանական սադրանքից հետո Քաշաթաղի (Լաչինի) միջանցքով բոլոր հումանիտար ուղևորափոխադրումներն ու բեռնափոխադրումները արգելափակվել են Ադրբեջանի կողմից։Կարմիր խաչի միջազգային կոմիտեի կողմից 25 բուժառու և նրանց հարազատներ էին տեղափոխվում Արցախից Հայաստան, սակայն Քաշաթաղի միջանցքում գործող ապօրինի ադրբեջանական անցակետում արգելվել է մեքենաների հետագա տեղաշարժը՝ նրանց ստիպելով վերադառնալ Ստեփանակերտ: Կասեցվել է նաև հումանիտար բեռնափոխադրման նպատակով Գորիս մեկնող ռուս խաղաղապահների բեռնատարների շարժը:
• Այսօր ձերբակալվել է ՀՀԿ փոխնախագահ Արմեն Աշոտյանը։ Ձերբակալությունն իրականացվել է բժշկական համալսարանում կատարված առերևույթ չարաշահումներին վերաբերող քրեական վարույթի շրջանակներում՝ խափանման միջոցի պայմանները խախտելու հիմքով։ Աշոտյանի նկատմամբ խափանման միջոց էր ընտրվել երկրից չհեռանալու մասին ստորագրությունը:

Այս ժամի լուրերը՝ տեսանյութում։