Ջալալ Հարությունյանի դեմ գործը կասեցվել է, Ադրբեջանն ականանետ է կիրառել Սոթքում․ Լուրեր

• Այսօր ժամը 14:15-ին, Ադրբեջանի ԶՈՒ ստորաբաժանումները տարբեր տրամաչափի հրաձգային զենքերից կրակ են բացել Սոթքի հատվածում տեղակայված հայկական դիրքերի ուղղությամբ՝ կիրառելով նաև ականանետ: Այս մասին հաղորդել է ՊՆ խոսնակ Արամ Թորոսյանը: Հայկական կողմում տուժածներ չկան:
• Ադրբեջանի կողմից Լաչինի միջանցքի ապօրինի արգելափակման 6 ամսվա ընթացքում Ստեփանակերտ-Գորիս մայրուղով (Լաչինի միջանցքով) մարդկանց երկկողմանի տեղաշարժի դեպքերը նվազել են շուրջ 200 անգամ (445,900-ի փոխարեն՝ 2246 մուտք և ելք): Այս մասին նշվել է Արցախի ՄԻՊ արտահերթ զեկույցում։ Դրանում ընդգծվել է, որ պլանային վիրահատությունների դադարեցման պատճառով մոտ 1400 քաղաքացի զրկվել է վիրահատվելու միջոցով առողջական խնդիրների լուծման հնարավորությունից, Ադրբեջանը հանրագումարային 117 օր շարունակ լրիվությամբ կամ մասնակիորեն ընդհատել է Հայաստանից Արցախ գազամատակարարումը, արդեն 154 օր շարունակ լրիվությամբ խաթարված է Հայաստանից Արցախ էլեկտրամատակարարումը, ինչը շարունակում է հանգեցնել հովհարային և վթարային անջատումների, փաստացի աշխատանքը և եկամտի աղբյուրը կորցրել է նախնական հաշվարկներով շուրջ 11,000 մարդ, երկրի տնտեսությանը հասցվել է շուրջ 346 մլն ԱՄՆ դոլարի վնաս։
• 2020 թվականի պատերազմի ժամանակ պաշտպանության բանակի հրամանատարի պաշտոնը զբաղեցրած Ջալալ Հարությունյանի նկատմամբ քրեական հետապնդումը կասեցվել է: Այս մասին Factor.am-ի հետ զրույցում ասաց Քննչական կոմիտեի մամուլի քարտուղար Գոռ Աբրահամյանը` հայտնելով, որ քրեական վարույթի շրջանակներում նշանակվել է հանձնաժողովային ռազմագիտական փորձաքննություն, որի եզրակացությունը էական նշանակություն ունի գործով իրավական գնահատականներ տալու առումով:

Այս ժամի լուրերը՝ տեսանյութում։