Փաշինյանը և Ալիևը հո չէի՞ն բոքսելու, հայհոյելու իրար Թուրքիայում․ շփումը վստահություն ձեռք բերելու լավ տարբերակ է․ Անի Սամսոնյան․ ՏԵՍԱՆՅՈՒԹ

Factor TV-ի հարցազրույցը «Լուսավոր Հայաստան» կուսակցության պատգամավոր Անի Սամսոնյանի հետ

-Վերջին շաբաթներին սահմաններին լարվածություն առաջացնելուն զուգահեռ՝ Ադրբեջանը նաև հրաժարվեց Վաշինգտոնում հունիսի 12-ին Հայաստանի հետ բանակցություններից։ Ձեր կարծիքով՝ սա հատուկ նպատակո՞վ է արվում՝ հրաժարվել հանդիպումներից և մեծացնել լարվածությունը։ Ի վերջո, ի՞նչ տեղի կունենա։

-Առաջին անգամ չէ, որ Ադրբեջանը հետաձգում է հանդիպումները։ Մենք գիտենք, որ ցանկացած բանակցություններից առաջ Ադրբեջանը դիմում է սադրանքների, որպեսզի ավելի շատ ճնշումներ գործադրի Հայաստանի վրա և փորձի այդ սպառնալիքի, ճնշումների ուժը կապիտալիզացնել բանակցությունների ընթացքում ու դրանից շահած դուրս գալ․ սա հստակ մարտավարություն է։ Չեմ կարող ասել, թե որոնք են պատճառները, դրանք վերլուծության արդյունքում պարզ կլինեն։ Միգուցե վերջին օրերին Ադրբեջանի գործողություններից, որոնք շատ կանխատեսելի են, կարող ենք ինչ-որ եզրակացություններ անել։ Բայց Ադրբեջանը բանակցություններում չի փայլում կառուցողականության վարքագծով, և բնական է, որ կարող է նման անպատասխանատու վերաբերմունք լինել արդեն իսկ նշանակված հանդիպումների դեպքում։

-ԵԱՀԿ-ում Հայաստանի ներկայացուցիչը՝ դեսպան Արմեն Պապիկյանը ԵԱՀԿ խորհրդի նիստում հայտարարում էր, որ հրամայական է Ստեփանակերտ-Բաքու քննարկումների համար միջազգային մեխանիզմի ներդրումը և արցախահայության անվտանգության իրավունքների երաշխավորումը, նաև երաշխավորի ինստիտուտի ձևակերպումը։ Ի՞նչ նոր իրականություն կստեղծվի արցախյան հակամարտության մեջ, եթե Հայաստանի առաջարկներն ընկալվեն։ Լուծումը ո՞րն է, որ փորձում են ստանալ ՀՀ իշխանությունները։

-Քանի որ մեզ և՛ ՌԴ-ից, և՛ Արևմուտքից՝ ԱՄՆ-ից ու Եվրոպայից, կոչ են անում խաղաղության պայմանագիր կնքել, մենք իրենց շատ հստակ ասում ենք, որ դա ունի ռիսկեր, և այդ ռիսկերում մենք չենք կարող հաշվի չառնել ԼՂ իրավունքները և անվտանգությունը։ Այսինքն՝ եթե կա մի փաստաթուղթ, որը դրված է սեղանին, և ստիպում են ստորագրել, ապա ստորագրելուց հետո պետք է հենց իրենք ապահովեն Արցախի հայության իրավունքներն ու անվտանգությունը։ Սա շատ հստակ է։ Դա լինելու է մի փաստաթուղթ, որը ստորագրելուց հետո Ադրբեջանը որոշելու է ամբողջությամբ օգտագործել իր սուվերեն իրավունքներն Արցախում։ Առաջին թիրախը լինելու է Արցախի ՊԲ-ն, այսինքն՝ լինելու են ահաբեկչական գործողություններ, և հայկական կողմը զինաթափվելու է։ Դրան հաջորդելու է ԼՂ բնակչության էթնիկ զտումը։ Ալիևը բացելու է միջանցք, ասելու է՝ դուրս եկեք։

Հարցազրույցն ամբողջությամբ՝ տեսանյութում։

Ռոբերտ Անանյան