Գրիգոր Մինասյանը` Դիլիջանի քրեականի պետի կողմից երեխային ծեծելու մասին․ ՏԵՍԱՆՅՈՒԹ

ՀՀ արդարադատության նախարար Գրիգոր Մինասյանը լրագրողների հետ ճեպազրույցում անդրադարձավ Դիլիջանի ոստիկանության քրեական վարչության պետի կողմից անչափահասին ծեծի ենթարկելու դեպքին։

Մարդուն կարող ե՞ն ծեծել և զղջալ ու պատասխանատվության չենթարկվել։ Մինասյանն անդրադառնալով այս հարցին, նշեց, որ Քրեական օրենսգրքի 81-րդ հոդվածն ունի գործուն զղջալու ինստիտուտ, այսինքն՝ եթե մարդը կատարել է ոչ մեծ ծանրության, միջին հանցանք և գործուն զղջում է, այդ իսնտիտուտը գործում է։

«Կոնկրետ այս գործով կա հնարավորություն, որ վերադաս դատարանը չեղարկի այդ որոշումը՝ քննիչի վարույթ չհարուցելու որոշումը, եթե չեմ սխալվում, եռամսյա ժամկետ կա, այսինքն դեռ ժամանակ կա և հնարավորություն շտկելու իրավիճակը»,- նշեց նախարարը։

Նշենք, որ երեկ, հունիսի 1-ին՝ երեխաների պաշտպանության օրը, լրատվամիջոցներով տարածվել էր տեսանյութ, որում երևում էր, թե ինչպես է ոստիկանության Դիլիջանի բաժնի քրեական հետախուզության բաժանմունքի պետը ծեծի ենթարկում 16-ամյա տղայի։  Ավելի ուշ հաղորդագրություն տարածվեց, որ ապրիլի 14-ին ՆԳՆ ոստիկանության ներքին անվտանգության վարչությունում դեպքի առնչությամբ սկսվել էր ծառայողական քննություն և հաստատվել վերոհիշյալ փաստը: Ինչպես նաև 16-ամյա տղան ճանաչվել է տուժող՝ նախաձեռնված քրեական վարույթի շրջանակներում։ Սակայն, ավելի ուշ քրեական վարույթ չհարուցելու մասին որոշում է կայացվել՝ հաշվի առնելով Դիլիջանի բաժնի քրեական հետախուզության բաժանմունքի պետի զղջալու։

Մանրամասները՝ տեսանյութում։