18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Ադրբեջանը 2023թ․ բյուջեում 650 մլն դոլարով ավելացնում է պաշտպանական ծախսերը
Քաղաքականություն
30.05.2023 | 22:11
Ադրբեջանի կառավարությունը նախատեսում է պետբյուջեից լրացուցիչ 1 միլիարդ մանաթ (588,2 միլիոն դոլար) հատկացնել պաշտպանության ոլորտում հատուկ նշանակության նախագծերի ֆինանսավորման համար, գրում են ադրբեջանական լրատվամիջոցները։
«2023 թվականի պետական բյուջեում այդ նպատակների համար նախատեսված ծախսերը կազմել են 2 միլիարդ 70 միլիոն մանաթ։ Այնուամենայնիվ, հաշվի առնելով պաշտպանունակության ուժեղացման անհրաժեշտությունը, խորհրդարան ներկայացված 2023 թվականի պետական բյուջեի փոփոխությունները նախատեսում են լրացուցիչ 1 միլիարդ մանաթի հատկացում՝ պաշտպանության ոլորտում հատուկ նպատակներով նախագծերի ֆինանսավորման համար։ Այսպիսով, այս նպատակների համար ծախսերն այս տարի կկազմեն 3 միլիարդ 70 միլիոն մանաթ (1 միլիարդ 805,9 միլիոն դոլար՝ ընթացիկ փոխարժեքով)»,- հայտարարել են Ադրբեջանի Ֆինանսների նախարարությունից։
Գերատեսչությունից նշել են, որ փոփոխությունները, ընդհանուր առմամբ, նախատեսում են «Պաշտպանություն և ազգային անվտանգություն» հոդվածով պետբյուջեի ծախսերի ավելացում 1 միլիարդ 105 միլիոն մանաթով կամ 650 միլիոն դոլարով (որից 1 միլիարդ մանաթը՝ հատուկ նպատակային նախագծեր պաշտպանության ոլորտում)՝ մինչև 6 մլրդ 54, 8 մլն մանաթ (3 մլրդ 561,4 մլն դոլար ընթացիկ փոխարժեքով):
Հավելենք, որ Ադրբեջանի իշխանությունները 2023 թվականի պետական բյուջեում պաշտպանության և ազգային անվտանգության ոլորտի ֆինանսավորումն ավելացրել էին 4,6 տոկոսով՝ հասցնելով 5 մլրդ 320,1 մլն մանաթի (ներկա փոխարժեքով՝ 3 մլրդ 129,5 մլն դոլար)։
Պաշտպանության և ազգային անվտանգության ծախսերի կառուցվածքում 2023 թվականին պաշտպանության ոլորտի կարիքների համար նախատեսված է 2 միլիարդ 403,4 միլիոն մանաթ, ազգային անվտանգության համար՝ 364,2 միլիոն մանաթ, սահմանային ծառայության կարիքների համար՝ 470,8 միլիոն մանաթ։
Էմմա Չոբանյան
