Տնտեսություն
02.05.2023 | 10:46
Կառավարության որոշմամբ դեռ նախորդ տարի «Նվազագույն ամսական աշխատավարձի մասին» օրենքում փոփոխություն է կատարվել, և 7 000 դրամով բարձրացվել է նվազագույն աշխատավարձը։ Հունվարի 1-ից արդեն նախկին 68 000 դրամի համամեմատ այն կազմում է 75 000 դրամ։
Factor.am-ն ուսումնասիրել է, թե նվազագույն ամսական աշխատավարձն ինչպիսի աճ է գրանցել 2000-ականներից մինչև այսօր, և ինչպիսին է եղել աճի տեմպը։ Այսպիսով, 2000 թվականին նվազագույն աշխատավարձը կազմել է 5000 դրամ։ 10 տարի հետո այն բարձրացել 6 անգամ և 2010-ին կազմել 30 000 դրամ։ Անցած տարվա դրությամբ աշխատավարձը 68 000 դրամ էր, որը 2010 թվականի համեմատ ավելի է 2,2 անգամ։
Մյուս ցուցանիշները՝ գրաֆիկում։
Միջին ամսական անվանական աշխատավարձը այս տարվա փետրվարի դրությամբ կազմում է 250 108 դրամ, որը 11 անգամ բարձր է 2000 թվականին գրանցած աշխատավարձի ցուցանիշից։ 2012-ին և 2017-ին միջին ամսական անվանական աշխատավարձի հաշվարկման երկու աղբյուր է կիրառվել։ 2012 թ. ցուցանիշները զուգահեռաբար վերահաշվարկվել են ըստ 2013-ի հունվարին ուժի մեջ մտած «Եկամտային հարկի մասին» օրենքի, համաձայն որի՝ միջին ամսական անվանական աշխատավարձը 28 000 դրամով ավելի է, քան նախնական հաշվարկով տրված ցուցանիշն էր։ Իսկ 2018 թ.-ից անցում է կատարվել միջին աշխատավարձի հաշվարկման տեղեկատվական նոր աղբյուրի՝ ՊԵԿ Եկամտային հարկի և սոցիալական վճարի անձնավորված հաշվառման տվյալների բազայի կիրառման:
Մյուս ցուցանիշները՝ գրաֆիկում։
2021-ին տղամարդկանց միջին ամսական անվանական աշխատավարձը 88 հազար դրամով ավելի է եղել կանանց աշխատավարձից։ Այսպիսով, 2021-ին տղամարդկանց միջին աշխատավարձի ցուցանիշը կազմել է 250 186 դրամ, իսկ կանանցը՝ 161 421 դրամ։ Դեռ 2000-ին տղամարդկանց միջին աշխատավարձը կանանց միջին աշխատավարձի համեմատ կրկնակի ավելի էր կազմում։ Իսկ 2017-ին տղամարդկանց և կանանց միջին աշխատավարձը 20 տարվա մեջ ամենամեծ տարբերությունն ունեցող ցուցանիշն է գրանցել․ տղամարդկանց միջին աշխատավարձը կանանց աշխատավարձի համեմատ գրեթե 100 հազար դրամով ավելի էր կազմել։
Մյուս ցուցանիշները՝ գրաֆիկում։
Անի Թամրազյան
