ԼՂ-ում հանդիպել են ռուս նոր հրամանատարի հետ․ Զախարովան՝ Լաչինի հարցում ՀՀ-ի ներգրավման մասին․ Լուրեր

• ՌԴ ԱԳՆ-ն սկզբունքորեն կարևոր է համարում, որ պաշտոնական Երևանը նպաստի Լաչինի միջանցքի շուրջ ստեղծված իրավիճակի փոխադարձ ընդունելի լուծումների որոնմանը։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։ Նա նշել է, թե Ռուսաստանն անհրաժեշտ ջանքեր է գործադրում Լաչինի միջանցքի շուրջ ստեղծված իրավիճակը կարգավորելու և այն եռակողմ համաձայնագրերի շրջանակ վերադարձնելու համար։ Զախարովան նաև ասել է, թե ՌԴ տարածքում Հայաստանի և Ադրբեջանի արտաքին գործերի նախարարների հանդիպման վերաբերյալ պայմանավորվածություն է ձեռք բերվել։ Սակայն ժամկետի վերաբերյալ ոչինչ չի հայտնել։
• Արցախի հակաճգնաժամային խորհրդի անդամ Տիգրան Պետրոսյանը տեղեկացրել է, որ հանդիպել են Արցախում ռուսական խաղաղապահ զորախմբի նորանշանակ հրամանատար Ալեքսանդր Լենցովի հետ։ Ըստ Պետրոսյանի՝ իրենք ռուսական զորքի հրամանատարին ասել են, որ հետպատերազմյան իրադարձությունների հաջորդականությունը բերել է նրան, որ հանրության մեջ կտրուկ նվազել է վստահությունը ռուս խաղաղապահների հանդեպ, և Արցախյան կողմում ակնկալում են ամենակարճ ժամկետներում Լաչինի միջանցքի ապաշրջափակումը։ Լենցովը վստահեցրել է, որ նրա համար այս պահին դա գերակա խնդիրն է, և որ այս պահին զբաղված է միջանցքի շուտափույթ ապաշրջափակմամբ։
• Հայաստանի ՄԻՊ Անահիտ Մանասյանն այսօր ասել է, որ Առաջին իսկ հնարավորության դեպքում փորձելու է Արցախ այցելել։ ՀՀ ՄԻՊ-ը վստահեցրեց, որ Արցախի ՄԻՊ Գեղամ Ստեփանյանի հետ ամենօրյա կապի մեջ է և փորձում է գտնել հնարավոր տարբերակներ՝ իր այցելությունն ի կատար ածելու համար։

Այս ժամի լուրերը՝ տեսանյութում։