Փաշինյանը՝ Լաչինում ՌԴ անելիքների մասին․ ՀՀ կառավարության պարտքն անցել է 10 մլրդ դոլարից․ Լուրեր

• Ռուսաստանի խաղաղապահ զորախումբը պետք է վերահսկողության տակ պահի Լաչինի միջանցքը և այսպիսով՝ ապահովի միջանցքի բնականոն գործունեությունը: Այսինքն, բացի Ռուսաստանից, որևէ մեկը Լաչինի միջանցքում վերահսկողություն չպետք է իրականացնի: Այս մասին այսօր հայտարարել է Նիկոլ Փաշինյանը կառավարության նիստի ժամանակ։ Միաժամանակ նա նշել է, որ ավելի է անհրաժեշտ դառնում Լեռնային Ղարաբաղում և Լաչինի միջանցքում ավելի լայն միջազգային ներկայությունը, ինչի առաջին քայլը պետք է լինի Լաչինի միջանցք և Լեռնային Ղարաբաղ միջազգային փաստահավաք հրատապ առաքելության գործուղումը։
• Փաշինյանը նշել է, որ Ադրբեջանի նպատակը Լեռնային Ղարաբաղի հայության էթնիկ զտումներ և ցեղասպանություն իրականացնելն է, և հենց սա պետք է լինի բոլորի, միջազգային հանրության ուշադրության առարկան:
• Անցնելով կառավարության նիստի օրակարգին՝ Փաշինյանն ասել է, որ մարդիկ մտահոգվում են 10 մլրդ դոլար պարտքից, բայց դա, ըստ Փաշինյանի, շատ թեթև պարտք է։ Ֆինանսների նախարար Հովհաննիսյանն էլ պնդել է, որ 2022 թվականի ընթացքում կառավարության արտաքին պարտքը նվազել է և՛ դրամային, և՛ դոլարային արտահայտությամբ։
• Թուրքիայի նախագահի աշխատակազմից հերքել են այն տեղեկությունը, թե երկրի նախագահ Ռեջեփ Թայիփ Էրդողանը առողջական խնդիրներ ունի։ Չնայած դրան՝ Թուրքիայի ընտրություններից երեք շաբաթ առաջ Էրդողանը չեղյալ է հայտարարել քարոզարշավային մի շարք միջոցառումներ։

Այս ժամի լուրերը՝ տեսանյութում։