Հասարակություն
18.04.2023 | 17:48
«Զանգեզուրի պղնձամոլիբդենային կոմբինատ» փակ բաժնետիրական ընկերության պահակակետում 56-ամյա տղամարդու սպանության գործը Քննչական կոմիտեից վերցվել է։ Քննչական կոմիտեի մամուլի խոսնակ Գոռ Աբրահամյանը Factor.am-ի հարցին ի պատասխան ասաց, որ գործը փոխանցվել է Դատախազությանը։ Ենթադրվում է, որ դատախազի որոշմամբ՝ գործի քննչական ենթակայությունը կփոխվի, այն կուղարկվի Ազգային անվտանգության ծառայություն և կմիացվի օրեր առաջ կալանավորված ադրբեջանցի երկու զինծառայողների գործին։
Հիշեցնենք, որ ՀՀ քննչական կոմիտեն ավելի վաղ հայտնել է, որ ապրիլի 12-ին՝ ժամը 18:10-ին, «Կապանի բժշկական կենտրոն» ՓԲԸ-ից և ոստիկանության Կապանի բաժնից ահազանգ և հաղորդում է ստացվել այն մասին, որ Կապան համայնքի հիշյալ պահակակետում մահացած տղամարդու մարմին կա, որի վրա առկա են հրազենային վնասվածքներ: Դեպքի առթիվ նախաձեռնվել է քրեական վարույթ: Դեպքի վայրի զննությամբ ՓԲ ընկերության պահպանության 2-րդ խմբի հենակետում՝ շարժական տնակի դիմաց, հայտնաբերվել է 56-ամյա տղամարդու դին՝ կրծքավանդակի առաջնային և հետին պատերին առկա միջանցիկ և գլխի աջակողմյան քունքային շրջանի կույր հրազենային վիրավորումներով: Դեպքի վայրից վերցվել են նմուշներ, երկփողանի հրացան, որը հայտնաբերվել է տնակի մեջ, ինչպես նաև քննությանը հետաքրքրող այլ առարկաներ: Նշանակվել են մի շարք փորձաքննություններ։
Այն բանից հետո, երբ Կապանում քաղաքացիները հայտնաբերել և վնասազերծել են Հայաստանի սահման անցած ադերբեջանցի զինծառայողներից երկրորդին, մամուլում հրապարակում է եղել այն մասին, որ, ամենայն հավանականությամբ, սպանությունը կատարել է ադրբեջանցի զինծառայողը, քանի որ վերջինիս ձեռքին հայտնաբերվել է ԶՊՄԿ-ի աշխատակցի հեռախոսը։
Օրեր անց Ազգային ժողովի նախագահ Ալեն Սիմոնյանը ԱՊՀ միջխորհրդարանական վեհաժողովի լիագումար նիստին հաջորդած ճեպազրույցում հայտարարել էր, որ ձերբակալված ադրբեջանցի զինծառայողներից մեկը կասկածվում է խաղաղ բնակչի սպանության մեջ:
Թե որքանով է այս պահին առկա քննությամբ հիմնավորվում ընկերության աշխատակցին ադրբեջանցի զինծառայողի կողմից սպանված լինելու հանգամանքը, մեզ հայտնի չէ։
Արաքս Մամուլյան
