06.10.2026 | 21:45
Հայկ Սարգսյանը հեռացվել է ՔՊ-ից
Դեպի Հայաստան գումարի հոսքն աճել է շուրջ 3,5 անգամ․ առաջատարը ՌԴ-ն է․ ՏԵՍԱՆՅՈւԹ
Տնտեսություն
17.04.2023 | 20:10
Այս տարվա հունվար-փետրվար ամիսներին ՀՀ բանկերի միջոցով ֆիզիկական անձանց փոխանցված գումարները նախորդ տարվա նույն ամիսների համեմատ աճել են շուրջ 3.5 անգամ։ Այս մասին Factor.am-ը տեղեկանում է Կենտրոնական բանկի հրապարակած ցուցանիշներից։
Այս տարվա առաջին 2 ամիսների ընթացքում դեպի Հայաստան տրանսֆերտների ծավալը կազմել է 1 մլրդ 100 մլն 31 հազար դոլար` նախորդ տարվա 308 մլն 16 հազար դոլարի փոխարեն։
Փոխանցումների ավելի քան 80 %-ը բաժին է հասնում Ռուսաստանին։ Այսպես․ Այս տարվա առաջին 2 ամիսներին ՌԴ-ից Հայաստան է ուղարկվել 882 մլն 150 հազար դոլար՝ նախորդ տարվա նույն ժամանակահատվածի 123 մլն դոլարի փոխարեն։ Այսինքն՝ ՌԴ-ից Հայաստան ֆիզիկական անձանց փոխանցումներն աճել են շուրջ 7 անգամ։
Հաջորդը ԱՄՆ-ն է։ Հունվար-փետրվար ամիսներին ԱՄՆ-ից Հայաստան է փոխանցվել 87 մլն դոլար՝ նախորդ տարվա նույն ամիսների 82 մլն դոլարի փոխարեն։ Աճը կազմել է 2 մլն դոլար կամ 2,4 %:
ՀՀ-ից արտահոսքը ևս աճել է․ աճը կազմել է շուրջ 2,3 անգամ։ Այսպես․ հունվար-փետրվար ամիսներին Հայաստանից արտերկիր է փոխանցվել 597 մլն 713 հազար դոլար, որից 62 մլն 851 հազար դոլարը ՌԴ, 55 մլն 44 հազար դոլարը՝ ԱՄՆ։
Նկատենք, որ դեպի ՌԴ և դեպի ԱՄՆ ուղարկված գումարները ընդհանուր արտահոսքի փոքր մասն են կազմում։ Իսկ թե որ երկրներ է փոխանցվել մնացած գումարը, Կենտրոնական բանկը տվյալներ չի տալիս։
Այնուամենայնիվ, դեպի ՀՀ զուտ ներհոսքը՝ այսինքն Հայաստան փոխանցված և այստեղ մնացած գումարներն աճել են։
2023 թվականի հունվար-փետրվարին դեպի ՀՀ զուտ ներհոսքը կազմել է 502 մլն 318 հազար դոլար՝ նախորդ տարվա նույն ամիսների 96 մլն 559 հազար դոլարի փոխարեն։ Այսինքն Հայաստան մտած գումարներն աճել են շուրջ 5,2 անգամ։
Անժելա Պողոսյան
