16.11.2024 | 16:17
Լեռնային շրջաններում ձյուն կտեղա
Մեկնարկեց Գագիկ Բեգլարյանից ենթադրյալ ապօրինի ծագում ունեցող գույքի բռնագանձման գործով նիստը
Հասարակություն
03.04.2023 | 16:11
Դատախազությունը պահանջում է Կապի և տրանսպորտի նախկին նախարար, Երևանի նախկին քաղաքապետ Գագիկ Բեգլարյանից և նրան փոխկապակցված անձանցից 16.8 միլիարդ դրամ արժեքով ապօրինի ծագում ունեցող գույք և ակտիվներ բռնագանձել։
Հակակոռուպցիոն դատարանում՝ նախագահությամբ դատավոր Նարինե Ավագյանի, քիչ առաջ մեկնարկեց Դատախազության հայցադիմումի քննությունը։
Դատախազության տարածած հաղորդագրության համաձայն՝ հայցադիմումով պահանջվում է բռնագանձել Երևան քաղաքում գտնվող 33 բնակարանները, տարածքները, շինությունները, ավտոհանգրվանները, որոնցից 11-ը գտնվում են Հյուսիսային պողոտայում, 7-ը՝ Խորենացի փողոցում, 3-ը՝ Արշակունյաց պողոտայում, 2 առանձնատները՝ Ազատության պողոտայում, 2 տարածքները՝ Թամանյան փողոցում, 2-ը (շինություն և ավտոկայանատեղի)՝ Տերյան փողոցում, ինչպես նաև Երևանի քաղաքի այլ վարչական շրջաններում գտնվող անշարժ գույքերը, Կոտայքի մարզում (համայնք Ծաղկաձոր) գտնվող 2 հողամասերը և Արարատի (համայնք Սիս) մարզում գտնվող 1 հողամասը, 1 տրանսպորտային միջոցը (MERCEDES-BENZ S600Լ մակնիշի ավտոմեքենա), իսկ անհնարինության դեպքում՝ դրանց միջին շուկայական արժեքը, որն ընդհանուր կազմում է 10.704.483.825 ՀՀ դրամ:
Բացի այդ, ըստ Դատախազության, բռնագանձման է ենթակա նաև 10 իրավաբանական անձանցում մասնակցության իրավունքը, 8 հանձնված փոխառության չվերադարձված մասի պահանջի իրավունքը՝ 1.879.759.719 ՀՀ դրամի չափով, 882.745.274,9 ՀՀ դրամ՝ որպես ապօրինի ծագում ունեցող գույքի օգտագործումից ստացված եկամտի, ինչպես նաև գույքերի վաճառքից գոյացած միջոցների մնացորդ, 3.317.008.604 ՀՀ դրամ, որը չի հիմնավորվում անձի օրինական եկամուտներով, ունի ապօրինի ծագում և հնարավոր չէ բռնագանձել՝ հիմք ընդունելով ապօրինի ծագում ունեցող գույքի բռնագանձման մասին օրենքի 20-րդ հոդվածի 4-րդ մասը:
Նշենք, որ Գագիկ Բեգլարյանը դատական նիստին չի մասնակցում: Դատարանը նիոտի մեկնարկին փորձեց պարզել կողմերի դիրքորոշումը նիստի ուղիղ հեռարձակման և տեսանկարահանման վերաբերյալ: Դատախազները առարկություն չներկայացրին, իսկ Բեգլարյանների ներկայացուիչներն առարկեցին ինչպես ուղիղ եթերի հեռարձակման, այնպես էլ նիստը ցանկացած այլ եղանակով տեսանկարահանելու դեմ, և դատարանն արգելեց տեսանկարահանումը:
