Էրդողանի գործընկերը Մարաշում հանդիմանել է երկրաշարժից փրկվածներին՝ նոր սկանդալի կենտրոնում հայտնվելով

Թուրքիայի նախագահ Ռեջեփ Թայիփ Էրդողանի կոալիցիոն գործընկեր, «Ազգայնական շարժում» կուսակցության առաջնորդ Դևլեթ Բահչելին կրկին հայտնվել է սկանդալի կենտրոնում։ Մասնավորապես, Բահչելին հանդիմանել է հարավարևելյան Քահրամանմարաշի Էլբիստանի բնակիչներին, որը փետրվարի 6-ին տարածաշրջանում տեղի ունեցած երկրորդ խոշոր երկրաշարժի էպիկենտրոնն է: Միջադեպը տեղի է ունեցել այն ժամանակ, երբ Բահչելին այցելել է Աղետների և արտակարգ իրավիճակների կառավարման վարչության (AFAD) կողմից ստեղծված վրանային ճամբար, գրում է Duvar-ը։

Տարածված տեսանյութում երևում է, որ երկրաշարժից տուժած մի քանի քաղաքացիներ կարգախոս են վանկարկում՝ պահանջելով Էլբիստան շրջանը վերածել նահանգի։ Բահչելին նկատողություն է արել քաղաքացիներին՝ ասելով. «Այսպիսի ցավալի օրը դուք իրավունք չունեք նման կարգախոսներով սաբոտաժի ենթարկել մեր նախագահի և այլ պաշտոնյաների այցը։ Լռություն է լինելու։ Ցրվե՛ք»։

Բահչելին Էրդողանի հետ միասին եղել է աղետից մեծապես տուժած շրջանում։ Նրա հեռանալու ընթացքում քաղաքացիներից մեկն ասել է․ «Պարո՛ն Դևլեթ, 2009-ին մենք ամեն ինչ արեցինք մեր նախագահի համար, երկրի վերջն է եկել, մարդիկ կործանվում են։ Սակայն մենք սիրում ենք մեր երկիրը»:

Րոպեներ անց դեպքի վայրում հայտնվել են ներքին գործերի նախարար Սուլեյման Սոյլուն ու իշխող «Արդարություն և զարգացում» կուսակցության փոխնախագահ Մահիր Ունալը՝ փորձելով հանգստացնել վրդովված քաղաքացիներին։

Էմմա Չոբանյան