Ինչո՞ւ են գործարարները փախչում ընդդիմադիր ՀՀԿ-ից. ՏԵՍԱՆՅՈՒԹ

Ազգային ժողովի ՀՀԿ խմբակցությունից առաջիկայում հնարավոր են նոր ելքեր: Վեց հեռացածներին կավելանան նոր դեմքեր ու, ամենայն հավանականությամբ, դարձյալ գործարար շրջանակից:

ՀՀԿ խմբակցությունն առայժմ լքած 6 պատգամավորից 3-ը հայտնի գործարարներ են՝ Արման Սահակյան, Արտակ Սարգսյան և Սամվել Ալեքսանյան:

Իրադարձությունները վերլուծվում են երեք տեսանկյունից՝ շարքերի մաքրում՝ նորմալ ընդդիմություն դառնալու նպատակով, ինչը ենթադրում է, որ պետք է ևս երեք տասնյակ մարդիկ դուրս գան խմբակցությունից, որոնք որևէ կապ չունեն ՀՀԿ-ի գաղափարախոսության ու կուսակցական գծի հետ:

Մյուս տեսանկյունն այն է, որ իշխանությունը հայտարարել է կոռուպցիայի դեմ անհաշտ պայքարի մասին, և ՀՀԿ-ն իրեն ապահովագրելու համար շարքերը մաքրում է:

Եվ վերջապես երրորդ տեսանկյունն առաջ է քաշում ՀՀԿ-ն ինքը՝ մեղադրելով պետական ապարատին ոչ համաչափ և ռեպրեսիվ հնարավոր գործողությունների մեջ:

Ամբողջ խնդիրը, բնականաբար, համակարգի մեջ է. համակարգն է այնպիսին, որ գործարարը հեշտ և ստվերում գործելու համար ոչ միայն ստիպված է անցնել ԱԺ, այլև ԱԺ-ում էլ ստիպված է լինել իշխանական ճամբարում՝ բիզնեսը պահելու համար:

Ճնշում եղե՞լ է գործարարների վրա, դժվար է ասել. ամեն դեպքում, «Գրանդ հոլդինգ»-ի քվոտայով միաժամանակ երկու պատգամավորների՝ ՀՀԿ և ՀՅԴ խմբակցություններում հայտնված Գրիգոր Ավալյանի և Արմեն Բաբայանի հրաժեշտը մանդատներին և այդ առիթով  հոլդինգի մեկնաբանությունը, թե Հայաստանի Ազգային ժողովում գործարարների ներկայության կարիք այլևս չի լինելու, ցույց է տալիս, որ արդեն վստահություն է առաջանում պետական կառավարման համակարգի նկատմամբ, բիզնես կանոնների նկատմամբ:

Իսկ թե այդ արդարության ու արդարադատության սկզբունքը դեռ քանի՞ հոգու դուրս կբերի ՀՀԿ-ից, ժամանակի հարց է: ՀՀԿ-ն ստիպված է հաշտվել ոչ միայն բացարձակ մեծամասնությունը կորցնելու փաստի հետ:

Մանրամասն՝ տեսանյութում:

Սևակ Հակոբյան