07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Իրանի ԱԳ նախարարն առաջիկայում այցելելու է Մոսկվա
Քաղաքականություն
24.02.2023 | 15:51
Իրանի ԱԳՆ մամուլի խոսնակ Նասեր Քանանին հայտնել է, որ արտգործնախարար Հոսեյն Ամիր Աբդոլահիանը շուտով Մոսկվա է այցելելու, գրում է Mehr գործակալությունը։
Նա նշել է, որ Թեհրանը և Մոսկվան կարող են կարևոր դեր խաղալ համաշխարհային էներգետիկ շուկայում հավասարակշռություն ստեղծելու գործում։ Քանանին ընդգծել է, որ ուկրաինական ճգնաժամի առնչությամբ Իրանի հասցեին արևմտյան երկրների մեղադրանքները համակցված են իրենց քաղաքական նպատակների հետ։
«Իրանի և Ռուսաստանի հարաբերությունները հիմնված են երկու երկրների ղեկավարների քաղաքական կամքի վրա։ Իրանն ու Ռուսաստանն ունեն մեծ ընդհանուր և փոխլրացնող տնտեսական կարողություններ։ Երկու երկրների միջև համագործակցությունն ընդլայնվում է՝ ելնելով երկու ժողովուրդների ընդհանուր շահերից։ Իրանի և Ռուսաստանի միջև ռազմական ու պաշտպանական հարաբերությունները երկու երկրների ընդհանուր շահերի շրջանակներում են և որևէ երրորդ երկրի դեմ չեն»,- ասել է Քանանին՝ հավելելով, որ երկու երկրների ռազմական համագործակցությունն ուկրաինական ճգնաժամից առաջ է սկսվել։
Նա մեղադրել է արևմտյան երկրներին ուկրաինական պատերազմի շարունակման մեջ՝ հավելելով, որ «պատերազմի մի կողմին տասնյակ միլիարդավոր դոլարների զենք արտահանող երկրները չեն օգնում պատերազմի ավարտին»։
Էմմա Չոբանյան
