Պողոսյանը գնաց՝ շանս տալով մշակույթին փրկվել, Ամիրյանի ձեռքերը կապված էին, հույսը նոր նախարարն է. Սուրեն Շահվերդյան. ՏԵՍԱՆՅՈՒԹ

«Տասը տարուց ավել է՝ գոռում եմ, որ հայ թատրոնը վերափոխվելու կարիք ունի, նոր սերունդ պետք է գա: Ծանոթ լինելով միջազգային թատրոնի մոդելին՝ պատրաստ եմ հուշել  և փորձել բնագավառը նորացնել»,-Factor.am-ի հետ զրույցում նշում է բեմադրիչ Սուրեն Շահվերդյանը: Նա հույս ունի, որ մոտ ապագայում կհանդիպի մշակույթի նախարար Լիլիթ Մակունցին: Բեմադրիչը կարևորում է այն փաստը, որ նախարարը երիտասարդ է  և կարծում է, որ դա կնպաստի թարմ մոտեցումների կիրառմանը ոլորտում:

«Այսօր մատների վրա կարող ենք հաշվել որակյալ ներկայացումներ: Պետք է խորհուրդ ստեղծվի, որը ճաշակ ու որակ կթելադրի: Մաֆիայի տարբերակը՝ դարերով նստել աթոռին, այլևս չպետք է հանդուրժվի: Դա անընդունելի է և ծիծաղելի»,- ասում է Սուրենը:

Նա անդրադառնում է մշակույթի նախկին նախարարների գործելաոճին: «Երբ Հասմիկ Պողոսյանն ազատվեց աշխատանքից, ես նրան հաղորդագրություն գրեցի՝ նշելով, որ հայ մշակույթը փրկվելու շանս ստացավ: Արմեն Ամիրյանը բավական լավ փոփոխություններ էր ուզում անել, բայց նրա ձեռքերը կապված էին, նրան ազատություն տրված չէր, վերևներից ասում էին՝ սա մեր երեխան է, սրան ձեռք մի տուր, սրան կոչում պետք է տանք և այլն: Վստահ եմ, որ նոր նախարարն ունի ոլորտում փոփոխություններ կատարելու ազատություն: Եթե այդպես չլինի, եթե տեսնեմ, որ տեղում դոփում ենք, նույն կերպով շարունակելու եմ քննադատությունս»,- մեկնաբանում է մեր զրուցակիցը:

Նրա համոզմամբ՝ ներկա կառավարության անդամները, կապ չունի՝ վարչապետի ընկերն են, ժամանակին շարժման մասնակից են եղել, թե ոչ, եթե իրենց ոլորտում սխալվեն, պետք է պատասխան տան: «Պատժելիության մթնոլորտ պետք է լինի, ամենամտերիմներն էլ պետք է պատժվեն»,- շեշտում է նա:

Մանրամասները՝ տեսանյութում:

Աննա Բաբաջանյան