Քաղաքականություն
20.01.2023 | 23:30
Թուրքիայի վեց կուսակցություններից բաղկացած ընդդիմադիր դաշինքը փետրվարին կհայտարարի նախագահի իր միասնական թեկնածուի անունը, գրում է Reuters գործակալությունը։
Նշենք, որ նախագահ Ռեջեփ Թայիփ Էրդողանն օրերս ակնարկել էր, որ նախագահական ու խորհրդարանական ընտրությունները կարող են տեղի ունենալ ժամկետից շուտ՝ մայիսի 14-ին։ Իշխող ուժի թեկնածուն հենց Էրդողանն է։
«Նախագահի թեկնածուի (վեց կուսակցության) անունը հավանաբար կհայտարարվի փետրվարին»,- լրագրողներին ասել է գլխավոր ընդդիմադիր Ժողովրդահանրապետական կուսակցության (CHP) առաջնորդ Քեմալ Քըլըչդարօղլուի խորհրդական Ունալ Չևիքոզը։
Թուրքիայի երկու հիմնական ընդդիմադիր կուսակցությունները՝ աշխարհիկ CHP-ն և աջ կենտրոնամետ ազգայնական IYI (Լավ) կուսակցությունը դաշինք են կնքել չորս փոքր կուսակցությունների հետ մի պլատֆորմի ներքո, որը կձգտի քանդել Էրդողանի գործադիր նախագահությունը՝ հօգուտ նախկին խորհրդարանական համակարգի։
Չևիքոզն ասել է, որ վեց ընդդիմադիր կուսակցությունների ղեկավարները հունվարի 30-ին երկու փաստաթղթերում ներկայացնելու են խորհրդարանական համակարգի անցումային շրջանի իրենց առաջարկները և կառավարության ծրագիրը:
Հավելենք, որ մեկ այլ ընդդիմադիր քրդամետ Ժողովուրդների դեմոկրատական կուսակցությունն էլ իր սեփական թեկնածուով է մասնակցելու նախագահական ընտրություններին։
Էմմա Չոբանյան
