Քաղաքականություն
12.01.2023 | 23:30
Թուրքիայի նախագահ, իշխող «Արդարություն և զարգացում» կուսակցության (ԱԶԿ) առաջնորդ Ռեջեփ Թայիփ Էրդողանին նվիրված թանգարանը կբացվի ամռանը նշանակված ընտրություններից առաջ: Այս մասին հայտնում են թուրքական լրատվամիջոցները՝ վկայակոչելով T24 լրատվականի Մուրատ Սաբունջուի սյունակը, փոխանցում է Turkish Minute-ը։
Ըստ Սաբունջուի՝ աշխատանքներ են տարվում թանգարանի կառուցման ուղղությամբ Ստամբուլի Քաշըմփաշա թաղամասում, որտեղ Էրդողանը ծնվել ու անցկացրել է պատանեկությունը։ Նշվում է, որ այն բացվելու է մինչև հունիսին կայանալիք խորհրդարանական և նախագահական ընտրությունները։ Ի դեպ, Էրդողանը չի բացառել, որ ընտրությունները կարող են ավելի վաղ անցկացվել։
Ինչ վերաբերում է բազմահարկ թանգարանին, սյունակագիրը նշում է, որ այն գտնվում է ջրի մոտ, ունի մեծ այգի և նախագծված է Մեծ Սելջուկյան և Օսմանյան կայսրությունների ժամանակ տարածված ճարտարապետական ոճերով։
Սաբունջուն ասում է, որ թանգարանի հողատարածքի սեփականատերն իշխանամետ գործարար Ֆեթահ Թամինջեն է՝ Rixos Hotels-ի հիմնադիրն ու նախագահը, որի ութ օֆշորային ընկերությունները Մալթայում են և նախկինում բացահայտվել էին Պանամայում և Paradise Papers-ի արտահոսքի ժամանակ: Սյունակագիրը նշում է, որ ծրագիրն իրականացնելու է Outdoor Factory (Açıkhava Fabrikası) ընկերությունը, որը հայտնի է ԱԶԿ-ի կառավարության հետ իր սերտ կապերով։
Նշվում է, որ թանգարանում ցուցադրվելու են լուսանկարներ ու տեսանյութեր Էրդողանի մանկությունից, սիրողական ֆուտբոլում անցկացրած տարիներից և հատկապես քաղաքական կարիերայի ընթացքից, ինչպես նաև նրա ընտանիքի անդամների լուսանկարներ։ Վիզուալ էֆեկտները ցուցադրվելու են շենքի պատերին և ճակատին։
Էմմա Չոբանյան
