Թուրքիան պատրաստվում է ընդդիմադիր քրդամետ կուսակցությանը զրկել ֆինանսավորումից ու հասնել դրա փակմանը

Թուրքիայի գլխավոր դատախազը խնդրել է Սահմանադրական դատարանին արգելափակել քրդամետ Ժողովուրդների դեմոկրատական կուսակցությանը (HDP) պատկանող բանկային հաշիվները՝ որպես կուսակցության քաղաքական արգելք պահանջող գործի մի մաս, գրում է Duvar-ը։

Պետական դատախազը գործ է հարուցել Թուրքիայի երրորդ ամենամեծ կուսակցության՝ HDP-ի դեմ 2021 թվականի մարտին՝ պահանջելով արգելել կուսակցության ենթադրյալ կապերը քուրդ զինյալների հետ: Կուսակցությունը հերքում է այդ մեղադրանքները։ Դատարանը մեղադրական եզրակացությունն ընդունել է 2021 թվականի հունիսին՝ նախագահ Ռեջեփ Թայիփ Էրդողանի՝ տարիներ տևած բռնաճնշումներից հետո, երբ հազարավոր HDP-ականներ դատապարտվել են հիմնականում ահաբեկչության հետ կապված մեղադրանքներով։

Վճռաբեկ դատարանի գլխավոր դատախազ Բեքիր Շահինը պահանջել է, որ կուսակցության բանկային հաշիվը, որով այն միջոցներ է ստանում գանձապետարանից, պետք է «շտապ» արգելափակվեն գործի ընթացքում։ Շահինը կրկնել է, որ կուսակցությունն «օրգանական կապեր» ունի Թուրքիայում արգելված Քուրդիստանի աշխատավորական կուսակցության (PKK) հետ և այդ միջոցներն օգտագործում է զինյալների խմբավորման նպատակներին համապատասխան։

Շահինը հունվարի 10-ին բանավոր կերպով հայտնելու է Սահմանադրական դատարանին գործի փակման մանրամասների վերաբերյալ: Այնուհետև դատարանը ժամանակ կտա HDP-ին՝ Շահինի կարծիքի դեմ բանավոր պաշտպանություն պատրաստելու համար:

Բացի կուսակցությունը փակելուց՝ մեղադրական եզրակացության մեջ նաև կոչ է արվում կուսակցության 451 անդամներին հինգ տարով զրկել քաղաքականությամբ զբաղվելու իրավունքից։

Քննադատներն ու փորձագետները նշում են, որ նախագահ Ռեջեփ Թայիփ Էրդողանն իր դաշնակից «Ազգայնական շարժում» կուսակցության առաջնորդ Դևլեթ Բահչելիի կողմից ծանր ճնշման տակ է՝ փակելու քրդամետ կուսակցությունը։

Էմմա Չոբանյան