Դատավորներն ընդհանուր ժողով են հրավիրել

Երևանի ընդհանուր իրավասության դատարանի Աջափնյակ 1 նստավայրում դատավորներն ընդհանուր ժողով են հրավիրել։ ԲԴԽ կայքում հրապարակված տեղեկատվության համաձայն՝ օրակարգում Դատավորների ընդհանուր ժողովի դատավորների գործունեության գնահատման հանձնաժողովի դատավոր չհանդիսացող անդամի ընտրության հարցն է։

Նշենք, որ հանձնաժողովի դատավոր չհանդիսացող անդամի տեղը թափուր է, քանի որ դրա անդամ, իրավական գիտնական Անահիտ Մանասյանը նշանակվել է Գլխավոր դատախազի տեղակալ։

ԲԴԽ կայքում հրապարակվել են հանձնաժողովի դատավոր չհանդիսացող անդամի ինքնառաջադրված թեկնածուների վերաբերյալ տեղեկությունները և թեկնածուների կեսագրական տվյալները:

Ինքնաառաջադրվել է 6 անձ՝ Կարեն Հակոբյանը, Հայկ Մարտիրոսյանը, Առնոլդ Վարդանյանը, Սիմոն Ֆարմանյանը, Հասմիկ Ստեփանյանը և Արմեն Եզեկյանը։

Կարեն Հակոբյանը փաստաբան է, Երևանի պետական համալսարանի դասախոս։ Նախկինում աշխատել է Վճռաբեկ դատարանում։

Հայկ Մարտիրոսյանը նույնպես փաստաբան է, դասախոսում է ԵՊՀ-ում, Ֆրանսիական համալսարանում։ Նախկինում աշխատել է Ոստիկանությունում, Դատախազությունում, Քննչական կոմիտեում։

Առնոլդ Վարդանյանը 2022 թվականից Վճռաբեկ դատարանի աշխատակազմի իրավական փորձաքննությունների ծառայության պետի ժամանակավոր պաշտոնակատարն է, համատեղությամբ նաև նույն դատարանի ներկայացուցիչն է ՄԻԵԴ բարձրագույն դատարանների ցանցում։ Սովորել է ինչպես Երևանի պետական համալսարանում, այնպես էլ արտերկրում, մասնակցել միջազգային կրթական ծրագրերի։

Սիմոն Ֆարմանյանը 2021 թվականից «Հայաստանի Հանրային հեռուստաընկերության» գլխավոր իրավաբանն է, փաստաբան է, «Փաստաբանների դպրոց» -ի դասախոս։

Հասմիկ Ստեփանյանը իրավաբանական գիտությունների թեկնածու է, դոցենտ, 29 գիտական աշխատությունների հեղինակ է, աշխատում է Պետական կառավարման ակադեմիայիմ, «Գլաձոր» համալսարանում։

Արմեն Եզեկյանը Կառավարման ակադեմիայրի իրավագիտության ամբիոնի վարիչն է։ Դասավանդում է նաև Հայ-Ռուսական համալսարանում, Փաստաբանների դպրոցում։

Արաքս Մամուլյան