26.06.2026 | 00:17
Իսրայելի ԱԳ նախարարը նախատեսում է կառավարությանը առաջարկել Հայոց ցեղասպանությունը ճանաչելու բանաձև
Ֆրանսիան կոչ է անում առանց նախապայմանների վերականգնել դեպի Լեռնային Ղարաբաղ մուտքն ու մատակարարումները
Քաղաքականություն
14.12.2022 | 10:15
Ֆրանսիան ափսոսում է, որ Հայաստանն ու Լեռնային Ղարաբաղն իրար կապող Լաչինի միջանցքն ավելի քան 24 ժամ փակ է, ինչը լուրջ մարդասիրական հետևանքներ ունի տեղի բնակչության համար․ ասված է Ֆրանսիայի Հանրապետության արտաքին գործերի և Եվրոպայի նախարարության մամուլի խոսնակի հայտարարության մեջ։
«Ֆրանսիան կոչ է անում առանց նախապայմանների վերականգնել Լեռնային Ղարաբաղ մուտքն ու մատակարարումները՝ հարգելով այնտեղի բնակչության իրավունքները»,- ասված է հայտարարության մեջ։
Նաև նշվում է, որ 2020 թվականի նոյեմբերի 9-ի եռակողմ հայտարարության համաձայն՝ Ադրբեջանի Հանրապետությունը պարտավորվել է ապահովել Լաչինի միջանցքով մարդկանց, տրանսպորտային միջոցների և ապրանքների անվտանգ տեղաշարժը երկու ուղղություններով։
Հիշեցնենք, որ դեկտեմբերի 12-ին ժամը 10։30-ի սահմաններում, ադրբեջանական կողմը խախտելով 2020 թվականի նոյեմբերի 9-ի եռակողմ համաձայնագրի դրույթները, բնապահպանական պատճառաբանություններով փակել է Արցախն աշխարհին կապող միակ ճանապարհը` ոտնահարելով քաղաքացիական բնակչության կենսական շահերն ու իրավունքները:
Նշենք նաև, որ Ադրբեջանը երեկվանից դադարեցրել է Արցախի Հանրապետության գազամատակարարումը:
Անահիտ Խաչատրյան
