Քաղաքականություն
08.06.2018 | 14:26Հունիսի 7-ին Աժ քննիչ հանձնաժողովի անդամներն ընդունել են հանրային խորհրդի ներկայացուցիչներ Դավիթ Սիմոնյանին, Կարեն Սիմոնյանին, Սերգեյ Ղազարյանին, Արմինե Պետրոսյանին, Վրեժ Ասմարյանին և Հովհաննես Ասմարյանին: Նախաձեռնող խմբի անդամները ներկայացրել են այս օրերին կատարված աշխատանքը և քաղաքացիներից ստացված դիմումների ոլորտային ուղղվածությունները: Նրանք նշել են նաև, որ հունիսի 5-ին ձևավորված խորհուրդն առ այսօր ստացել է 675 դիմում, որոնց թվում՝ հանրային հնչեղության հարցեր չպարունակող նամակներ. այս մասին հայտնում են ԱՀ ԱԺ լրատվության և հանրության հետ կապերի բաժնից:
Խորհրդի ներկայացուցիչ Կարեն Սիմոնյանը որոշ մանրամասներ է ներկայացրել խորհրդի գործունեության ընթացքի մասին և խնդրել մարդկանց մի քիչ համբերատար լինել:
«Ձևավորված հանրային խորհուրդն արդեն ամենատարբեր բնույթի հազարին հասնող դիմումներ է ընդունել: Դրանք հիմնականում սոցիալական բնույթի են: Արդեն դրական օրինակներ ունենք, կոնկրետ մարդկանց խնդիրներ են լուծվել: Ես խնդրում եմ, որ մարդիկ մի քիչ համբերատար լինեն: Մենք առաջին հերթին զբաղվում ենք զոհվածների, վիրավորների և բազմազավակ ընտանիքների հարցերով: Եկեք մի քիչ համբերեք և սկզբում ամենածանր խնդիրներ ունեցող մարդկանց հարցերով զբաղվենք»,- ասում է Սիմոնյանը:
37-ամյա Ռոբերտ Ալավերդյանն ասում է, որ տարիներ շարունակ տարբեր գերատեսչությունների է դիմել, սակայն իր խնդիրները լուծումներ չեն ստացել: «Ես փող չեմ ուզում, այլ աշխատանք»,- ասում է նա:
«Բոլորը խնդիր է, ֆինանսական, տուն չունեմ, երկու անչափահաս երեխաներ կան, ինձ նման մարդկանց համար տեղ չկա, որ գնան աշխատեն: Ընդհանուր մարդկանց վիճակն է վատ: Իմ նման մարդիկ չեն կարողանում լուծել իրենց խնդիրները: Ամեն տեղ դիմել եմ, 6 տարի է արդեն այս վիճակն է: Դիմել եմ վարչակազմ և ասել, որ ես փող չեմ ուզում ձեզանից, ինձ աշխատանքի հնարավորություն տվեք: Այսօր շատ հաշմանդամներ կան, ովքեր չեն կարողանում աշխատանքի վայր գտնել իրենց ընտանիքները պահելու համար: Ոչ մի տեղ աշխատանքի չեն ուզում ընդունել մեզ», – ասում է Ռոբերտը:
Մարութ Վանյան. Ստեփանակերտ
