Քաղաքականություն
27.09.2022 | 21:41
Հայաստանի Հանրապետության սուվերեն տարածքի նկատմամբ Ադրբեջանի վերջին ռազմական ագրեսիայի հետևանքով ստեղծված իրավիճակում թվում է, թե Անկարայի և Բաքվի դիրքորոշումները նույնական են, սակայն վերջին օրերին բավական ուշագրավ միտումներ են նկատվում։
Մասնավորապես, պաշտոնական Բաքուն, խեղաթյուրելով իրականությունը, պարբերաբար նշում է, թե Հայաստանը կառուցողական չէ բանակցություններում և զբաղվում է դրանց իմիտացիայով։
Ի դեպ, այսօր Ադրբեջանի ԱԳՆ-ն հերթական նման կեղծ հայտարարությունն է տարածել։
«Հայաստանը վերջապես պետք է դադարեցնի բանակցությունների իմիտացիան ու իրական, կառուցողական քայլեր ձեռնարկի։ Տարածաշրջանի խաղաղ զարգացման այլընտրանք չկա»,- ասվում է հայտարարության մեջ։
Ադրբեջանական հռետորաբանության այս ֆոնին՝ Բաքվի դաշնակից Անկարայից բավական ուշագրավ հայտարարություններ են հնչում։ Մասնավորապես, Թուրքիայի նախագահի գլխավոր խորհրդական, մամուլի խոսնակ, ինչպես նաև Անկարայի արտաքին քաղաքականության հիմնական դերակատարներից Իբրահիմ Քալընն օրերս տված հարցազրույցում հայտարարել էր, որ Հայաստանը կառուցողական է բանակցություններում։ Նա նշել էր նաև, որ Թուրքիան չի ակնկալում, որ Ադրբեջանն ու Հայաստանը շարունակելու են ռազմական գործողությունները։
«Մենք կարծում ենք, որ հաջորդ գործընթացը ընթանալու է բանակցությունների միջոցով։ Հուսանք, որ հակամարտությունները պատերազմի չեն վերածվի։ Հայաստանի վարչապետը մինչ այժմ կառուցողական դիրքորոշում է ցուցաբերել։ Նրա և Ալիևի բանակցությունները շարունակվում են դրական, կառուցողական: Մաղթում ենք, որ խաղաղությունն ու կայունությունը շարունակվի»,- ասել էր Քալընը։
Նա նշել էր, որ Թուրքիան շարունակում է կանգնած մնալ Ադրբեջանի կողքին, միաժամանակ, շարունակվում են շփումները Հայաստանի հետ։
«Մենք ցանկանում ենք անել քայլեր, որոնք արագ արդյունքի կհանգեցնեն։ Մեր նախագահը Պրահայում կարող է հանդիպել Փաշինյանի հետ։ Կարծում ենք, որ մեր նախագահի հանդիպումը նույնպես դրան կնպաստի»,- նշել էր թուրք պաշտոնյան։
Ստացվում է, որ Անկարայի համար Երևանը կառուցողական է բանակցում, իսկ ահա Բաքվի համար՝ «զբաղվում է բանակցությունների իմիտացիայով»։
Էմմա Չոբանյան
