16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Պեսկովը հայտարարել է, որ Պուտինը մշտապես տեղեկացվում է Ուկրաինայի պատերազմի ընթացքի մասին
Քաղաքականություն
12.09.2022 | 16:56
Ռուսաստանի նախագահ Վլադիմիր Պուտինը մշտապես տեղեկացվում է Ուկրաինայի պատերազմի ընթացքի մասին։ Այս մասին ասել է Կրեմլի խոսնակ Դմիտրի Պեսկովը, գրում է ՌԻԱ Նովոստին։
Նրա խոսքով՝ Պուտինը «շուրջօրյա կապի մեջ է պաշտպանության նախարարի և այլ զինվորականների հետ»։
«Իհարկե, այն ամենը, ինչ տեղի է ունենում, ցանկացած գործողություն, որ զինվորականներն անում են, զեկուցվում է գերագույն հրամանատարին»,- ասել է Պեսկովը՝ պատասխանելով հարցին, թե ինչպես է Պուտինն արձագանքել Խարկովի մարզում ռուսական զորքերի նահանջին։
Նա ևս մեկ անգամ հայտարարել է, որ Կրեմլը «հեռանկար չի տեսնում» Պուտինի և Ուկրաինայի նախագահ Վլադիմիր Զելենսկիի հանդիպման համար։
«Մենք բանակցային հեռանկար չենք տեսնում, նման հաղորդակցության համար նախադրյալներ չկան»,- ասել է Պեսկովը։
Կրեմլի խոսնակը կրկին հայտարարել է, որ «Ռուսաստանը ձգտելու է իրականացնել հատուկ ռազմական գործողության բոլոր նպատակները»։ Բացի այդ, Պեսկովը հերքել է Զապորոժիեի ատոմակայանից զորքերի դուրսբերումը։
«Զապորոժիեի ատոմակայանից զորքերը դուրս բերելու մասին խոսք չկա, գլխավորն Ուկրաինային ստիպելն է՝ դադարեցնել ատոմակայանի հրետակոծությունը, դա հղի է աղետալի հետեւանքներով»,- ասել է Պեսկովը։
Հիշեցնենք, որ Խարկովի մարզում հակահարձակման ընթացքում Ուկրաինայի զինված ուժերն ազատագրել են մի քանի խոշոր քաղաքներ՝ Բալակլեյան, Կուպյանսկը և Իզյումը։
Տաթև Ֆռանգյան
