Ինձ ինչի՞ եք ասում. պաշտպանության հանձնաժողովում ՔՊ-ականները վիճում են միմյանց հետ․ ՏԵՍԱՆՅՈՒԹ

ԱԺ պաշտպանության և անվտանգության հարցերի մշտական հանձնաժողովի նիստում առաջին ընթերցմամբ քննարկվում է «Զինվորական ծառայության և զինծառայողի կարգավիճակի մասին» օրենքում լրացումներ կատարելու մասին նախագիծը:

Նախագծի համաձայն՝ պարտադիր զինվորական ծառայության զորակոչից տարկետում կտրվի նաև բնագիտական, տեխնոլոգիական, ճարտարագիտական և մաթեմատիկական (ԲՏՃՄ) ուղղություններով պետության համար առաջնահերթ և կարևորություն ներկայացնող մասնագիտություններով համապատասխան բուհերում սովորողներին:

Ներկայացնելով նախագիծը՝ ՀՀ ԿԳՄՍ նախարար Վահրամ Դումանյանը հայտարարեց, որ այս խնդիրն առաջացավ անմիջապես, երբ 2017թ․-ին զինապարտության մասին օրենքում փոփոխություն եղավ, և բոլորը պարտավոր էին ծառայել։ «Երբ շատ ուսանողներ ստանում էին տարկետումներ բակալավրում և մագիստրատուրայում, հետո՝ ասպիրանտուրայում, այդտեղ շատերը խնդրի առաջ էին կանգնում, որովհետև մինչև 27 տարեկանը կամ պետք է զորակոչվես, կամ բանակից ազատված լինես։ Ստացվում էր, որ ասպիրանտի կրթությունը կիսատ էր մնում և դառնում անիմաստ մի բան։ Առաջարկում ենք սովորելու համար տարկետում ստացած և 27 տարեկանի հասածների համար տարիքը սահմանել մինչև 28»,- նշեց Վահրամ Դումանյանը։

ԱԺ «Քաղաքացիական պայմանագիր» խմբակցության պատգամավոր Քրիստինա Պողոսյանն արձագանքեց նշելով, որ տարկետմանը կողմ է, բայց իր դիտարկմամբ՝ սա ձևական տարկետում է:

Նույն խմբակցության պատգամավոր Վահագն Ալեքսանյանը հակադարձեց, նշելով, որ տարկետումը ոչ թե նպատակ է, այլ գործիք է նպատակին հասնելու համար և հավելեց. «Մենք ունենք հստակ ռազմավարություն պրոֆեսիոնալ բանակի անցնելու, հասնելու այնպիսի իրավիճակի, որ նունիսկ MIT ընդունվածները պետք է 4,5 ամիս պարտադիր ծառայեն ՀՀ բանակում»:

«Վիգեն Սարգսյանի լավագույն որոշումներից եղել է տարկետում հանելը»,- ընդգծեց իշխանական պատգամավորը։

Ալեքսանյանը նկատեց, որ շատերն իրենց տղա երեխաներին Հայաստանից տանում են, փորձում են ուրիշ երկրի քաղաքացիություն ստանալ՝ բանակում ծառայելուց խուսափելու համար. «Չգիտե՞ք ինչ ծավալների է հասնում այդ երևույթը»:

«Ինձ ինչի՞ եք ասում»,- արձագանքեց Քրիստինա Պողոսյանը:  ՔՊ-ականների միջև վեճ առաջացավ:

Մանրամասները՝ տեսանյութում: