12.02.2026 | 13:34
Եթե «Մահ կամ ազատություն» ասող տեսակը չլիներ, էս ազգը ո՞նց էր պետություն ունենալու․ Ռուստամյան․ ՏԵՍԱՆՅՈՒԹ
«Անորակ հրթիռների» գործով կալանավորված Արմեն Հարությունյանը գրավի դիմաց ազատ է արձակվել
Հասարակություն
03.09.2022 | 18:15
Անորակ հրթիռներ ձեռք բերելու գործով ավելի քան երկու ամիս կալանքի տակ գտնվող ՀՀ զինված ուժերի հրթիռային զորքերի և հրետանու նախկին պետ-վարչության պետ, գեներա-մայոր Արմեն Հարությունյանը գրավի դիմաց ազատ է արձակվել: Այս մասին Factor.am-ի հետ զրույցում տեղեկացրեց պաշտպան Հակոբ Ենոքյանը՝ զերծ մնալով սահմանված գրավի չափը հանրայնացնելուց։
Դեռ նախորդ ամիս քննիչը միջնորդություն էր ներկայացրել դատարան Հարությունյանի նկատմամբ ընտրված խափանման միջոց կալանավորումը ևս երկու ամսով երկարացնելու մասին: Քննության ընթացքում, սակայն, պաշտպանական կողմն իր հերթին միջնորդել էր գրավ կիրառել։ Երևանի ընդհանուր իրավասության դատարանը՝ դատավոր Տաթևիկ Մուրադյանի նախագահությամբ, օգոստոսի 11–ին որոշում էր կայացրել բավարարելու քննիչի ներկայացրած կալանավորման ժամկետը երկարացնելու միջնորդությունը՝ թույլատրելի ճանաչելով նաև գրավի կիրառումը: Արմեն Հարությունյանն ազատ էր արձակվել հենց հաջորդ օրը՝ գրավը վճարելուց անմիջապես հետո։
Հիշեցնենք՝ հունիսի 17-ին ՀՀ ազգային անվտանգության ծառայությունը հայտնել էր, որ ՀՀ ազգային անվտանգության ծառայության (ԱԱԾ) քննչական դեպարտամենտում քննվող քրեական գործի նախաքննության ընթացքում իրականացված քննչական և դատավարական գործողությունների արդյունքում ձերբակալվել է ՀՀ զինված ուժերի հրթիռային զորքերի և հրետանու նախկին պետ-վարչության պետ, գեներալ-մայոր Արմեն Հարությունյանը: Ըստ ԱԱԾ-ի հաղորդագրության՝ ՀՀ զինված ուժերի հրթիռային զորքերի և հրետանու նախկին պետ-վարչության պետ, գեներալ-մայոր Արմեն Հարությունյանը 523.089.000 ՀՀ դրամին համարժեք, 1.083.000 ԱՄՆ դոլարի անորակ հրթիռներ ձեռք բերելու պայմանագիր է կնքել, ինչը պետության համար առաջացրել է նյութական ծանր հետևանքներ։
Արմեն Հարությունյանն իրեն մեղավոր չի ճանաչում առաջադրված մեղադրանքում։
Ռոզա Վարդանյան
