ՀՀ-ում բոլոր մաքսատները գործելու են ՀՀ և ԵԱՏՄ մաքսային օրենսդրությանը համապատասխան․ ՊԵԿ

ՀՀ-ում բոլոր մաքսակետերը գործում են և գործելու են ՀՀ և ԵԱՏՄ մաքսային օրենսդրությանը համապատասխան։ Այս մասին այսօր Factor.am-ի հետ զրույցում տեղեկացրեց ՊԵԿ մամուլի խոսնակ Լուսինե Մկրտչյանը։

Հիշեցնենք, որ օգոստոսի 18-ին իրավական ակտերի նախագծերի միասնական հարթակում քննարկման է դրվել 3 նոր մաքսատուն- վարչություններ ստեղծելու վերաբերյալ նախագիծ։ Նախագծի հիմնավորման մեջ նշվում է, որ նախագծի ընդունումը պայմանավորված է օգոստոսի 4-ին կառավարության նիստի ընթացքում վարչապետի կողմից տրված հանձնարարականների կատարման ապահովման անհրաժեշտությամբ։ Ակնկալվող արդյունքը Հայաստանում Ադրբեջանի հետ սահմանի նոր անցման կետերի ստեղծումն է՝ պետական սահմանով անձանց, ապրանքների և տրանսպորտային միջոցների անցումը կազմակերպելու և իրականացնելու նպատակով: Նոր անցակետերը նախատեսվում են ստեղծել Գեղարքունիքի (Սոթք համայնքից դեպի ՀՀ պետական սահման M11 մայրուղի՝ ավտոմոբիլային), Արարատի (Երասխ համայնք՝ ավտոմոբիլային), Սյունիքի (Քարահունջ համայնքից մոտ 7,5 կմ հարավ, հարավ-արևելք Մ2 մայրուղի՝ ավտոմոբիլային) մարզերում հայ-ադրբեջանական սահմանի ուղղությամբ: Նախագծի ընդունմամբ անհրաժեշտություն կառաջանա ներգրավել լրացուցիչ ֆինանսական միջոցներ նոր անցման կետերի շինարարական և կահավորման աշխատանքների իրականացման համար:

ՊԵԿ-ից հետաքրքրվեցինք՝ արդյո՞ք այս 3 մաքսակետերը ևս գործելու են նույն պայմաններով, ինչ Վրաստանի և Իրանի սահմաններին տեղակայված մաքսակետերը։ «Տարբերություն չկա։ Հայաստանի սահմաններում բացվող, ներկայում և ապագայում գործող ՀՀ մաքսատները գործում են ՀՀ և ԵԱՏՄ մաքսային օրենսդրությանը համապատասխան»,- նշեց ՊԵԿ մամուլի խոսնակը։

Անժելա Պողոսյան