Քաղաքականություն
12.05.2018 | 16:00Թավշյա հեղափոխության ընթացքում հանրության շարժիչ ուժերից մեկն այն երաժշտությունն էր, որը ստեղծվեց հենց շարժման համար և, կարելի է, ասել, դարձավ շարժման «հիմնը»։ Factor.am-ը զրուցել է «Իմ քայլը» երգի կատարող, երաժշտության հեղինակ ու ձևավորող Հայկ Ստվերի հետ։ Նա պատմել է երգի ստեղծման պրոցեսի մասին։
Պարզվում է՝ շարժման առաջնորդ, արդեն ՀՀ վարչապետ Նիկոլ Փաշինյանը, ով «Իմ քայլը» երգի խոսքերի հեղինակն է, ավելի վաղ գրել է մեկ տուն ևս, որը, սակայն, հանվել է։ Հայկի խոսքով՝ Նիկոլ Փաշինյանի հետ աշխատելը բավական հեշտ և արդյունավետ է եղել։
«Նա չի նայում մարդկանց տարիքին, եթե խորհուրդը տեղին է՝ ընդունում է: Երբ նոր էինք սկսկել միասին աշխատել, մտավախություն ունեի, որ տեքստի հետ կապված խորհուրդս չի ընդունի, բայց այդպես չեղավ»,- ասում է երգիչը:
Մեր զրուցակիցը երբեք չի պատկերացրել, որ «Իմ քայլը» կդառնա հիթ: Հարցին, թե համագործակցության առաջարկն ընդունելուց չի վախեցել արդյոք, որ նախկին իշխանությունների կողմից ճնշում կլիներ, Հայկը պատասխանում է. «Ինձ հաճախ էին հարցնում՝ բա չես վախենու՞մ: Վախ, իհարկե, կար, բայց պատասխանատվությունը, որ մի օր պետք է երկիրը հանենք այս վիճակից, ավելի մեծ էր»:
Այս օրերին շատերն են հեղափոխության մասին երգեր գրում: Հայկը սա գովելի է համարում, բայց միևնույն ժամանակ նկատում է. «Լավ կլիներ՝ հեղափոխության մասին մյուս երգերը Սերժ Սարգսյանի հրաժարականից առաջ գրվեին»:
Ինչպես հայտնի է, Հայկը բնակվում էր Ուկրաինայում, բայց այժմ, կարծես, այնտեղ վերադառնալու մտադրություն չունի: «Երևի էլ չգնամ Ուկրաինա, պատճառ չեմ տեսնում վերադառնալու»,- ասում է նա:
Մանրամասները՝ տեսանյութում:
Աննա Բաբաջանյան
