Տնտեսություն
07.07.2022 | 12:21Լարսը բաց է, և այժմ բեռնատար մեքենաներն անցնում են Լարսի անցակետով: Այս մասին Կառավարության նիստից հետո լրագրողների հետ ճեպազրույցի ժամանակ ասաց ՀՀ էկոնոմիկայի նախարար Վահան Քերոբյանը:
«Մեր արած աշխատանքի արդյունքում վերջին մեկուկես ամսվա ընթացքում կարողացել ենք հասնել նրան, որ Լարսի թողունակությունն էապես մեծացել է, և եթե 2 ամիս ամիս առաջ Լարսի անցակետն անցնող հայկական մեքենաների միջին օրական քանակը 130 էր. հիմա մոտ 250 է. մոտ կրկնակի ավելացել է հայկական մեքենաների թողունակությունը»,- նշեց Վահան Քերոբյանը՝ նշելով, որ, այնուամենայնիվ, խնդիրը դեռ մինչև վերջ լուծված չէ:
Էկոնոմիկայի նախարարի հավաստմամբ՝ աշխատանք է իրականացվում արագ փչացող ապրանքների անցման ուղղությամբ. «Եվ դա ևս էապես թեթևացրել է գյուղմթերք արտահանողների աշխատանքը և նվազեցրել է ռիսկերը. դա մեր, Վրաստանի և Ռուսաստանի կառավարության համատեղ աշխատանքի արդյունքն է: Հիմա մենք աշխատում ենք այս ուղղությամբ և կարծում ենք, որ մեկ ամսվա ընթացքում հերթերն ամբողջությամբ կվերանան, և մենք խնդիր չենք ունենա մինչև եղանակների վատանալը»:
Քերոբյանը հիշեցրեց, որ դրան զուգահեռ աշխատանքներ են տարվում այլ ճանապարհների բացման, այլ երթուղիների ստեղծման ուղղությամբ: «Դրանցից մեկն էլ լաստանավն է: Ըստ էության վերջնակետին մոտ ենք, երեկ խոսել եմ վրացի գործընկերների հետ, և ակնկալում ենք, որ առաջիկա օրերին, ի վերջո, մեր հարցը լուծումը կստանա, եթե ոչ՝ պլան Բ-ին կանցնենք. Բաթումի նավահանգստի միջոցով կկարողանանք նույն գործողությունն անել և ստեղծել ալտերնատիվ տարբերակ: Խնդիրը մեզ համար գերկարևոր է, քանի որ Հայաստանը պետք է ունենա լավ կապվածություն աշխարհի հետ: Այս ուղղությամբ մենք անդադար աշխատում ենք՝ թե՛ ուղղությունների, թե՛ տրանսպորտային միջոցների, թե՛ դրանց քանակի ավելացման ուղղությամբ»,- նշեց Քերոբյանը:
Մանրամասները՝ տեսանյութում:
