Մակրոնի կուսակցությունը հաղթեց, բայց բացարձակ մեծամասնություն չի ունենա Ֆրանսիայի խորհրդարանում

Ֆրանսիայում կայացել է խորհրդարանական ընտրությունների երկրորդ փուլը։ Քվեաթերթիկների 100%-ը մշակելուց հետո հայտնի է դարձել, որերկրի գործող նախագահ Էմանուել Մակրոնի«Միասին» դաշինքը նախնական տվյալներով հաղթել է ընտրություններում։ Քվեարկության արդյունքները հրապարակել է երկրի ներքին գործերի նախարարությունը։

Մակրոնի կոալիցիայի օգտին քվեարկել է ընտրողների 38,57%-ը, ձախակողմյան Ժան-Լյուկ Մելենշոնի «Նոր ժողովրդական էկոլոգիական և սոցիալական միությունը» (Nupes) ստացել է ձայների 31,6%-ը, Մարին Լը Պենի Ազգային հանրահավաքը՝ 17,3%-ը, Հանրապետականները՝ 6,98%-ը։

Այսպիսով՝ «Միասին» դաշինքը նոր խորհրդարանում ստանում են 245 տեղ, Nupes դաշինքը՝ 131․ Մարին Լե Պենի կուսակցությունը՝ 89, Հանրապետականները՝ 61։ Բացի այդ, խորհրդարանում ներկայացված կլինեն տարբեր ձախակողմյան ուժերի 22 պատգամավոր,  10՝ տարբեր աջակողմյան քաղաքական կուսակցությունների ներկայացուցիչ և 10 տարածաշրջանային պատգամավոր։

Այսպիսով, 1980-ականներից՝ Ֆրանսուա Միտերանի իշխանության տարիներից հետո Ֆրանսիայում նման իրավիճակ առաջին անգամ է ստեղծվում, երբ նախագահի կոալիցիան Ազգային ժողովում չի ստանում բացարձակ մեծամասնություն։

«Խորհրդարանը կաթվածահար կլինի, իսկ Մակրոնի համար դժվար կլինի օրենքներ ընդունել, հատկապես՝ վիճահարույց նախագծեր կենսաթոշակային համակարգի բարեփոխման համար»,- գրում է Politico-ն։

Հիշեցնենք, որ Ֆրանսիայում  խորհրդարանական ընտրությունների առաջին փուլն անցկացվել էր հունիսի 12-ին։

Տաթև Ֆռանգյան