Քաղաքականություն
08.06.2022 | 18:19
Եվրամիության արտաքին գործերի և անվտանգության քաղաքականության հարցերի գերագույն հանձնակատար Ժոզեպ Բորելը հայտարարել է, որ Ուկրաինային, Վրաստանին, Մոլդովային և Հարավային Կովկասի երկրներին աջակցություն ցուցաբերելն առավել կարևոր է, քան երբևէ։ Նա նշել է, որ ԵՄ-ն շարունակելու է ամրապնդել գործընկեր երկրների հետ կապերը, գրում է agenda.ge-ն։
Բորելն ասել է, որ ԵՄ ռազմավարական կողմնացույցը «հստակորեն ընդգծում է» Միության մտադրությունը՝ խթանել համագործակցությունն «անվտանգության և պաշտպանության» ոլորտում Արևելյան գործընկերների հետ:
«Մենք առաջարկում ենք ավելացնել ոչ մահաբեր զենքերի տեսքով ռազմական օգնությունը Վրաստանին ու Մոլդովային։ Այն կաջակցի լոգիստիկ, կիբերպաշտպանության, ռազմաբժշկական, ինժեներական և շարժունակության հնարավորություններին»,- ասել է ԵՄ պաշտոնյան։
Նա նշել է, որ Ռուսաստանի ագրեսիան Ուկրաինայում նոր իրականություն է ստեղծել Արևելյան գործընկերության համար։
«Մենք համոզված ենք, որ տարածաշրջանային շրջանակը մնում է ուժի մեջ և կարևոր գործիք է՝ ԵՄ արժեքներն ու շահերը Արևելյան հարևանությունում նախագծելու համար։ Դա նաև գործիք է, որը կօգնի ավելի խորացնել մեր հարաբերություններն Արևելյան գործընկերների հետ՝ ի շահ և՛ ԵՄ, և՛ Արևելյան գործընկերության երկրների քաղաքացիների»,- ասել է Բորելը։
Էմմա Չոբանյան
