Բրյուսելում տեղի է ունենալու հայ և ադրբեջանցի երիտասարդների հանդիպում

Ադրբեջանցի տասը երիտասարդներ հունիսի 6-10-ը կայցելեն Ստրասբուրգ, որտեղ կհանդիպեն Ֆրանսիայից, Գերմանիայից և Հայաստանից երիտասարդների հետ, գրում են ադրբեջանական լրատվամիջոցները։

Հանդիպումը տեղի է ունենալու OFAJ կազմակերպության «Համագործակցության նոր ոլորտներ Եվրամիության Արևելյան գործընկերության շրջանակում» ծրագրի շրջանակում։

Այսօր տեղի ունեցած միջոցառմանը Ադրբեջանում Ֆրանսիայի դեսպան Զաքարի Գրոսը հայտնել է, որ OFAJ-ը ցանկանում է նպաստել հայերի և ադրբեջանցիների հաշտեցման գործընթացին Ֆրանսիայի, Գերմանիայի և ԵՄ-ի կողմից աջակցվող բանակցությունների համատեքստում:

«Այս նախաձեռնությունը քննարկվել և համաձայնեցվել է առաջնորդների կողմից անցյալ տարվա վերջին Բյուսելում կայացած հանդիպման ժամանակ։ Գերմանիայի և Ֆրանսիայի համատեղ նախաձեռնությունն իրականացվում է Արևելյան գործընկերության շրջանակում»,- ասել է Գրոսը։

Նրա կարծիքով՝ հաշտեցումը, որը ձեռք է բերվել Գերմանիայի և Ֆրանսիայի միջև Երկրորդ համաշխարհային պատերազմից հետո, հնարավոր է նաև Հայաստանի ու Ադրբեջանի միջև։

«Նման հանդիպում Ստրասբուրգում առաջին անգամ է տեղի ունենալու։ Մենք շատ ուրախ ենք, որ երիտասարդ սերունդը աջակցություն է հայտնում տարածաշրջանում խաղաղությանը։ Ժամանակն է խաղաղություն կառուցելու։ Գիտեմ, որ հեշտ չէ, սակայն շատ կարևոր է»,- ասել է դեսպանը։

Գերմանիայի դեսպան Վոլֆգանգ Մանիգն էլ նշել է Ֆրանսիայի և Գերմանիայի ԱԳ նախարարությունների կողմից այս գործընթացին ցուցաբերվող աջակցությունը։

«Գերմանիայի և Ֆրանսիայի միջև հակամարտությունները շարունակվել են հարյուրավոր տարիներ, բայց նրանք խաղաղության են հասել իրենց տարածաշրջանում։ Երևանում մեր գործընկերները հանդիպում են հայ երիտասարդների հետ, որոնց հետ դուք շփվելու եք»,- դիմելով ծրագրի մասնակիցներին՝ ասել է  դեսպանը։

Էմմա Չոբանյան